اسلام آباد(پاکستان پوائنٹ نیوز24۔اگست2017ء) وزیر اعظم شاہد خاقان عباسی دی صدارت ہیٹھ قومی سلامتی دے امور بارے اجلاس ہویا۔ اجلاس وچ وفاقی وزیراں، آئی بی دے ڈی جیز، چیئرمین جوائنٹ چیف آف سٹاف کمیٹی تے تِناں ہتھیار بند فوجاں دے سربراہواں نے رلت کیتی۔ وزیر اعظم دی صدارت ہیٹھ ہون والے اجلاس وچ امریکا دی جنوبی ایشیا بارے نویں پالیسی اُتے گل بات کیتی گئی۔
اجلاس وچ امریکی صدر دی پاک افغان پالیسی بارے حکمت عملی تے پاکستان ولوں موثر ردعمل بارے غور کیتا گیا۔ اجلاس وچ وزیر خارجا و سکیورٹی اداریاں نے ٹرمپ دے پاکستان مخالف بیان تے پاکستان دے ردعمل اُتے بریفنگ دتی۔ اجلاس وچ آکھیا گیا کہ امریکا افغانستان وچ کارروائیاں پاکستان دی سرحد نیڑے لیانا چاہندا اے۔ اجلاس وچ قومی سلامتی کمیٹی نے پاکستان وچ دہشت گردی بارے چین دے بیان دا خیرمقدم کردے ہوئے آکھیا کہ پاکستان نے دہشت گردی خلاف فرنٹ لائن سٹیٹ دا کردار ادا کیتا پر پاکستان دیاں قربانیاں نوں رد کیتا گیا۔
