راولپنڈی(پاکستان پوائنٹ نیوز17۔اگست2017ء) چیف آف آرمی سٹاف جنرل قمر جاوید باجوہ نے آکھیا اے کہ کامیابی لئی کسے شارٹ کٹ ول نہیں ویکھنا چاہیدا، سوشل میڈیا راہیں منفی بیاناں نوں ودھوتری دتی جا رہی اے ایہدے توں بچنا چاہیدا، پاک فوج پرامن، محفوظ تے مستحکم پاکستان لئی پرعزم اے، نوجوان میرٹ تے قانون دی حکمران اُتے عمل کرن۔ ڈی جی آئی ایس پی آر مطابق آرمی چیف جنرل قمر جاوید باجوہ نے آئی ایس پی آر دا دورا کیتا۔
جتھے اوہناں نے انٹرن شپ کرن والے نوجواناں نال ملاقات کیتی۔ ایس موقعے تے اوہناں نے نوجواناں نال گل بات کردے ہوئے آکھیا کہ ہر پاکستانی آپریشن ’ردالفساد‘ دا سپاہی اے۔ پاک فوج نے دہشت گردی تے تشدد خلاف بہت کامیابیاں حاصل کیتیاں۔ اوہناں نے آکھیا کہ امن لئی سبھ نوں اپنا کردار نبھانا پئے گا۔ پاک فوج پرامن، محفوظ تے مستحکم پاکستان لئی پرعزم اے۔ اوہناں نے آکھیا کہ کامیابی لئی کسے شارٹ کٹ ول نہیں ویکھنا چاہیدا۔ جنرل قمر جاوید باجوہ نے آکھیا کہ سوشل میڈیا راہیں منفی بیاناں نوں ودھوتری دتی جا رہی اے ایہدے توں بچنا چاہیدا۔ اوہناں نے آکھیا کہ داعش تے ہور شدت پسند تنظیماں نوجواناں نوں نشانا بنا رہیاں نیں۔ نوجوان شدت پسند تنظیماں دے حوالے نال خبردار رہن۔
