لاہور(پاکستان پوائنٹ نیوز17۔اگست2017ء) مسلم لیگ (ق) دے صدر و سابق وزیر اعظم چودھری شجاعت حسین نے دوجے دیہاڑے وی کراچی وچ مصروف دن لنگھایا۔ مسلم لیگیاں نوں اک کرن لئی کئی سیاسی رہنماواں نال ملاقاتاں کرن دے نال نال ورکرز کنونشن نال خطاب کیتا تے سابق رکن اسمبلی حمیدہ کھوڑو تے ایم کیو ایم پاکستان دی رکن نسرین جلیل دے شوہر دے فوت ہون تے ہرکھ لئی اوہناں دے گھر وی گئے۔
ایس موقعے تے اوہناں نال مرکزی سیکرٹری جنرل طارق بشیر چیمہ ایم این اے، صوبائی صدر اسد جونجیو تے ہور مسلم لیگی وی سن۔ بعدوں میڈیا نال گل بات کردے ہوئے اوہناں نے آکھیا کہ ایوب کھوڑو سینئر مسلم لیگی رہنما سن اوہناں دے پُتر مسعود کھوڑو تے سید پرویز علی شاہ دی مسلم لیگ وچ رلت نال سندھ وچ پاکستان مسلم لیگ مضبوط ہوئے گی۔ اوہناں نے آکھیا کہ آئین وچ ترمیم دیاں گلاں کیتیاں جا رہیاں نیں، میرا موقف اے کہ آئین وچ ترمیم کرنی اے تے 62،63لئی نہیں تعلیم لئی کیتی جائے۔اوہناں دا کہنا سی کہ 18ویں ترمیم نے تعلیم دا بیڑہ غرق کر دتا اے۔ ساری دنیا وچ تعلیم وفاق دے کنٹرول وچ اے پر ایتھے صوبیاں انڈر اے جو کہ ہرکھ والی گل اے۔
