لاہور(پاکستان پوائنٹ نیوز17۔اگست2017ء) پیپلز پارٹی دی اعلا قیادت نے واضح کیتا اے کہ آرٹیکل 62،63نوں ترمیم لئی پارلیمنٹ وچ لیاندا گیا تے جائزا لتا جائے گا، اج وی پارلیمنٹ و جمہوریت نال آں، خان صاحب غیر سیاسی بندے نیں، اوہ وی فل ٹاس تے کھیڈ رہے نیں، نوبال اُتے آن گے تے ویکھاں گے، ہن نواز شریف تے اوہناں دے خاندان نوں سیاست وچ نہیں ویکھ رہیا، ہن ایگریمنٹ نہیں الیکشن وچ امیدوار کھلارن دا ٹائم اے۔
اج بلاول ہاؤس لاہور وچ چیئرمین پیپلز پارٹی بلاول بھٹو زرداری تے شریک چیئرمین پیپلز پارٹی آصف زرداری نے سانجھی پریس کانفرنس کردے ہوئے آکھیا کہ لاہور وچ آیا تے گہما گہمی ودھ گئی اے۔ اوہناں نے آکھیا کہ اسیں پچھلی وار میاں صاحب دا نہیں حکومت دا ساتھ دتا سی، جمہوریت نوں بچایا سی۔ کجھ لوکاں نوں علط فہمی سی کہ اسیں میاں نواز شریف دا ساتھ دتا۔
اسیں اج وی پارلیمنٹ و جمہوریت نال آں پر ہن جمہوریت نوں کوئی خطرا نہیں اے۔ اوہناں نے آکھیا کہ پیپلز پارٹی سیاست کر رہی اے۔ سیاست وچ کوئی گل آخری حرف نہیں ہوندی۔ ساڈے دور وچ کوئی سیاستی قیدی نہیں سی۔اک سوال دے جواب وچ اوہناں نے آکھیا کہ جدوں میں امریکا سی تے ایہ وی جلاوطن سن تے گل بات ہوندی سی پر تعلقات ملن نال ہوندے نیں۔تعلقات وچ انسان اپنے بھرا نوں چار ورھیاں بعدوں فون کرے تے اوہ وی فون نہیں چُکدا۔ نواز شریف دا طرز حکمرانی سیاسی نہیں سی۔ اوہناں نے آکھیا کہ اجے ریفرنسز آئے نیں اوہدے اندر کیہ اے ایہ پتا نہیں۔
