سانوں چاہیدا کہ اجیہا کم نہ کرئیے کہ اداریاں نوں اپنے خلاف کر لئے:چودھری نثار علی خان

اسلام آباد(پاکستان پوائنٹ نیوز10۔اگست2017ء) مسلم لیگ (ن) دے سینئر رہنما چودھری نثار علی خان نے آکھیا اے کہ چالو حالات وچ آخیری حد تیکر نہیں جانا چاہیدا بلکہ برداشت تے صبر نال ٹرنا چاہیدا، سانوں چاہیدا کہ اجیہا کم نہ کرئیے کہ اداریاں نوں اپنے خلاف کر لئے، بھٹو صاحب جے پی این اے نال گل کر لیندے تے معاملات نہ وِگڑدے۔ میڈیا رپورٹس مطابق اوہناں نے اج قومی اسمبلی وچ ارکان نال غیر رسمی گل بات کردے ہوئے آکھیا کہ چالو حالات وچ آخیری حد تیکر نہیں جانا چاہیدا۔

اوہناں دا کہنا سی کہ بھٹو صاحب جے پی این اے نال گل کر لیندے تے معاملات نہ وِگڑدے پر بھٹو صاحب آخیری لیول تیکر گئے جہدا اوہناں نوں نقصان وی ہویا۔ اوہناں نے آکھیا کہ بے نظیر بھٹو صاحبہ 86وچ واپس آیاں تے اوہناں دا شاندار استقبال کیتاگیا پر واپسی مگروں بے نظیر نے ایس طرحاں تحریک چلائی کہ کارکن وی تھک گئے تے جدوں الیکشن دا نتیجہ آیا تے پیپلز پارٹی دی خاہش مطابق قومی اسمبلی دیاں سیٹاں نہ مل سکیاں۔اوہناں نے آکھیا کہ سانوں اجے وی سوچ سمجھ کے پارٹی دی مضبوطی لئی کم کرنا پئے گا۔