لاہور(پاکستان پوائنٹ نیوز09۔اگست 2017ء) لاہور دی مقامی عدالت نے حمزہ شہباز شریف دی مبینہ بیوی عائشہ احد نوں سکیورٹی دین دی ہدایت کر دتی۔ تفصیل مطابق لاہور دی مقامی عدالت وچ ایڈیشنل سیشن جی لاہور نے عائشہ احد دی درخاست تے سنوائی کیتی تے درخاست گزار دے وکیل علی ضیاء باجوہ نے دسیا کہ وزیر قانون پنجاب رانا ثناء اللہ خان نے اوہناں دی موکلہ خلاف اعتراض جوگ بیان دتا تے ہن صوبائی وزیر قانون دے آکھن تے عائشہ احد نوں ہراساں کیتا جا رہیا اے۔
درخاست وچ عائشہ احد نے ایہ دعوا کیتاکہ وردی تے چٹے کپڑے والے بندے اوہناں دے گھر باہر اوہناں دی نگرانی کردے نیں۔ درخاست گزار عائشہ احد نے عدالت توں استدعا کیتی کہ صوبائی وزیر قانون نوں ہراساں کرن توں روکدے ہوئے مینوں سکیورٹی دتی جائے۔ جہدے تے مقامی عدالت نے پولیس نوں ہدایت کیتی کہ ایس گل نوں یقینی بنایا جائے کہ عائشہ احد نوں ہراساں نہ کیتا جائے۔ عدالت نے عائشہ احد دی درخاست تے جنوبی چھاؤنی پولیس توں وی جواب منگ لیا اے۔ ایڈیشل سیشنل جج نے آؤندی سنوائی تے عائشہ احد نوں وی عدالت وچ پیش ہون دی ہدایت کرد ے ہوئے سنوائی 10اگست تیکر ملتوی کر دتی گئی۔
