کوئٹہ(پاکستان پوائنٹ نیوز18۔اگست 2016ء) کوئٹہ وچ اک تقریب نال خطاب کردے ہوئے وزیر اعلا بلوچستان ثناء اللہ زہری نے آکھیا کہ میں کوئٹہ دُکھانت بارے ذمے واری نال کہنا واں کہ کوئٹہ دُکھانت وچ بھارتی ایجنسی را ملوث اے۔ جمعرات دے دیہاڑے اپنے خطاب وچ اوہناں نے آکھیا کہ بلوچستان اندر ہور کارروائیاں وچ وی بھارتی ایجنسی را ملوث رہی اے۔ کلبھوشن یادیو دے سارے نیٹ ورک نوں گرفتار کر لِتا گیا اے۔
وزیر اعلا بلوچستان ثناء اللہ زہری نے براہمداغ نوں تنقید دا نشانا بناندے ہوئے آکھیا کہ بلوچستان وچ ہندوواں توں ملن والے کُجھ ٹکیاں لئی اپنے ای بھراں نوں شہید کروایا گیا۔ اوہناں نے آکھیا کہ بھارت ای براعمداغ بگٹی تے ہور شرپسنداں نوں سپانسر کر رہیا اے۔اوہناں دا کہنا سی کہ براعمداغ نے مودی نوں سلام پیش کر کے غداری کیتی، براعمداغ نے ہندوستانی ایجنٹ بن کے بلوچستان وچ خون دیاں نہراں وگائیاں پر اسیں شہیداں نال غداری نہیں کراں گے، تے بلوچستان وچ پاکستان دشمنی دی سازش نوں ناکام بنا دیاں گے۔
اوہناں دا کہنا سی کہ بلوچستان وچ لوک کسے دے آکھن اُتے باہر نہیں آئے۔ لوک مودی دے بیان اُتے احتجاج کرن لئی اپنے گھراں توں باہر نکلے نیں۔ وزیر اعلا نے آکھیا کہ بھارت نے جو جنگ شروع کیتی اے ایہدے وچ جِت ساڈی ای ہووے گی۔ دہشت گرد جِتھے وی ہون گے اوہناں خلاف کارروائی کراں گے۔اوہناں دا کہنا سی کہ بھارتی آزادی دیہاڑ اُتے بھارتی وزیر اعظم نریندر مودی دے بیان دی مذمت کرنے آں۔
اوہناں نے آکھیا کہ بلوچستان دے باغی بھارت توں فنڈ لے رہے نیں۔ پر بلوچستان پاکستان دا حصا اے تے اک جمہوری حکومت دے تحت کم کر رہیا اے۔ اوہناں نے ہور آکھیا کہ شہیداں دے لہو دی قسم اسیں دہشت گرداں نوں اوہناں دے انجام تیکر پہنچاواں گے۔ ایس دوران اوہناں نے مودی خلاف نعرے بازی کیتی۔مودی دا جو یار اے، غدار اے، عڈار، اے۔
