لاہور(پاکستان پوائنٹ نیوز31۔جولائی 2017ء) وزیر اعلا پنجاب شہباز شریف نوں وزیرا عظم پاکستان دے عہدے لئی بطور امیدوار نامزدگی مگروں وزیر اعلا پنجاب شہباز شریف دے پُتر حمزہ شہباز شریف نے وزیر اعلا پنجاب بنن لئی (ن) لیگی حلقیاں وچ لابنگ شروع کر دتی اے (ن) لیگی وسیلیاں مطابق ایس مقصد لئی پچھلے دیہاڑے ڈپٹی میئر وسیم قادر دے دفتر وچ اک اجلاس ہویا۔
ڈپٹی میئر وسیم قادر دی صدارت ہیٹھ ہون والے اجلاس وچ علاقے دے (ن) لیگی کارکناں دی وڈی گنتی نے رلت کیتی۔ اجلاس دوران (ن) لیگی کارکناں نے وزیر اعلا حمزہ شہباز شریف دے نعرے لائے۔ ایس حوالے نال لیگی کارکناں دا کہنا اے کہ پنجاب دی وزارت اعلا لئی حمزہ شہباز توں بہتر کوئی ہور امیدوار نہیں اوہ پنجاب دے لوکاں دے مسائل سمجھدے نیں۔ (ن) لیگی وسیلیاں دا ایہ وی کہنا اے کہ ایس حوالے نال باقی 8ڈپٹی میئر وی اپنے اپنے دفتراں وچ اجلاس سد کے کارکناں توں رائے لین مگروں قرار داد منظور کرن گے ۔ دوجے پاسے وزیر اعلا پنجاب دے عہدے لئی پاکستان مسلم لیگ (ن) دے دو سینئر وزیراں رانا ثناء اللہ تے مجتبی شجاع الرحمان دے ناں وی ساہمنے آ رہے نیں۔
