اسلام آباد(پاکستان پوائنٹ نیوز20۔جولائی 2017ء) مسلم لیگ (ق) دے صدر و سابق وزیر اعظم چودھری شجاعت حسین نے آکھیا اے کہ اوہناں دی پارٹی انتخابی اصلاحات دا حکومتی بل رد کر دی اے، جدوں تیکر آن والے الیکشن نوں صاف و شفاف بنان لئی مطلوبا اصلاحات نہیں کیتیاں جانیدیاں حکومت دے مجوزا بل اُتے دستخط نہیں کراں گے۔ چودھری شجاعت حسین نے اک بیان وچ آکھیا کہ حکومت انتخابی اصلاحات دے ناں تے جو بل پارلیمنٹ وچ پیش کرنا چاہندی اے ایہدے وچ کوئی شے نہیں۔
بنیادی گل ایہ اے کہ الیکشن کمیشن دے موجودا نظام وچ چیف الیکشن کمشنر دی حیثیت برائے ناں اے۔ اوہناں دا کہنا سی کہ جے کمیشن دے ارکان دی وڈی گنتی کسے رکن اسمبلی نوں ناکام قرار دے دیوے تے چیف الیکشن کمشنر وی جِتے ہوئے رکن اسمبلی دی داد رسی نہیں کر سکدا۔ اوہناں نے ہور آکھیا کہ انتخابی اصلاحات دی پارلیمانی کمیٹی دی ہن تیکر سو میٹنگز ہو گئیاں نیں جہدے تے قومی خزانے توں سو کروڑ رُپئے خرچ کرن دے باوجود صفر نتیجہ افسوسناک اے۔
ایہ گل وی سمجھوں باہر اے کہ ایہناں میٹنگاں دی کارروائی نوں ان کیمرا یعنی خفیہ رکھیا گیا اے جیویں پارلیمانی کمیٹی الیکشن ریفارمز نہیں بلکہ نیو کلیئر ریفارمز کر رہی سی۔ پاکستان مسلم لیگ دا مطالبا اے کہ پارلیمانی کمیٹی دی ہن تیکر دی ساری کارروائی نوں پبلک کیتا جائے تاں جے لوکائی جان سکے کہ انتخابی اصلاحات دے ناں تے حکومت قوم نال کیہ مذاق کرن جا رہی اے۔
