اسلام آباد (پاکستان پوائنٹ نیوز16۔اگست 2016ء) پاکستان تحریک انصاف دے چیئرمین عمران خان نے پاناما لیکس ایشو اُتے سپریم کورٹ وچ پٹیشن دائر کرن دا اعلان کر دِتا۔ تفصیل دے مطابق منگل دے دیہاڑے پریس کانفرنس نال خطاب کردے ہوئے عمران خان دا کہنا سی کہ نواز شریف نے قومی دولت نوں باہرلے ملک گھلیا تے ساڈے کول منی لانڈرنگ دے ثبوت موجود نیں۔ عمران خان دا کہنا سی کہ اگلے دو ایتوار گجرات تے جہلم وچ عوامی جلسہ کرن دے بعد 3 ستمبر نوں گوجرنوالا توں لاہور ول کنٹینر مارچ شروع کیتا جاوے گا۔
اوہناں نے آکھیا کہ اج ورلڈ بنک نے اک نواں انکشاف کیتا اے، پاکستان توں کاشف قاضی دے اکاؤنٹ توں ساڈھے 3 لکھ ڈالر باہر گھلے گئے نیں۔ 1993 وچ کیتی گئی منی لانڈرنگ دے ثبوت موجود نیں۔ اوہناں نے آکھیا کہ شیمروک کارپوریشن دے بینیفشر نواز شریف نیں۔ شیمروک کارپوریشن دا انکشاف ورلڈ بنک نے کیتا اے۔ اک سوال دے جواب وچ اوہناں نے آکھیا کہ نواز شریف دی کرپشن دے ثبوت موجود نیں۔
نواز شریف نے قومی دولت نوں باہرلے ملک گھلیا۔ اوہناں دا کہنا سی کہ نواز شریف کہندا اے کہ آف شور کمپنیاں اوہناں دے بالاں دے ناں نیں، پر ساڈے کول رجسٹریاں نیں۔ 20 ورھیاں دی مریم نواز دے ناں کمپنی بنائی گئی۔ اوہناں دا کہنا سی کہ احتجاج کر کے مینوں مقبولیت گوان دا ڈر نہیں، جدوں لاہور ول نکلے تے مقبولیت دا سبھ نوں پتا چل جاوے گا۔اوہناں نے کشمیر دے معاملے اُتے گل بات کردے ہوئے آکھیا کہ مودی نے غلط آکھیا کہ آزاد کشمیر وچ حالات بہتے خراب نیں، مودی دے بیان دی مذمت کرداں آں، جدکہ نواز شریف نوں وی بیان دی مذمت کرنی چاہیدی اے صرف سرتاج عزیز دی مذمت نال فرق نہیں پیندا۔
