راولپنڈی(پاکستان پوائنٹ نیوز12۔جولائی2017ء) چیف آف آرمی سٹاف جنرل قمر جاوید باجوہ نے آکھیا اے کہ سی پیک خطے وچ امن و استحکام لئی بہت ضروری اے، منصوبے بارے ساڈیاں صلاحتاں اُتے کسے نوں شک نہیں ہونا چاہیدا، منصوبا پاکستان، مغربی چین تے خطے لئی گیم چینجر اے، سی پیک دی کامیابی لئی سارے اداریاں نوں بھرپور تعاون کرنا پئے گا۔ ڈی جی آئی ایس پی آر مطابق آرمی چیف جنرل قمر جاوید باجوہ نے سی پیک لاجسٹک انٹرنیشنل فورم نال خطاب کردے ہوئے آکھیا کہ این ایل سی نوں سی پیک بارے اجیہے فورمز دا انعقاد کردے رہنا چاہیدا۔
منصوبے بارے ساڈیاں صلاحتاں اُتے کسے نوں شک نہیں ہونا چاہیدا۔ اوہناں نے آکھیا کہ منصوبے دی راہ وچ کوئی وی اوکڑاں ہون انشاءاللہ سی پیک نوں کامیاب بناواں گے۔ سی پیک خطے وچ امن و استحکام لئی ضروری اے۔ چین دا ون بیلٹ ون وژن روڈ پوری دنیا لئی اے۔ اسیں منصوبے توں بھرپور فائدا چُکاں گے۔ آرمی چیف دا کہنا سی کہ تجارت تے سرمایا کاری دی ودھوتری لئی قانون بناواں گے۔
اوہناں نے آکھیا کہ سی پیک دی کامیابی لئی سارے اداریاں نوں بھرپور تعاون کرنا پئے گا۔ اوہناں نے آکھیا کہ 2030تیکر اقتصادی راہداری نوں کامیابی بنانا میرا خاب اے۔ ایس توں پہلاں چیف آف آرمی سٹاف جنرل قمر جاوید باجوہ نال فرانس دے سفیر نے ملاقات کیتی۔ ملاقات دوران خطے دی سکیورٹی صورتحال تے آپسی تعلقات بارے وچار وٹاندرا کیتا گیا۔
