اسلام آباد(پاکستان پوائنٹ نیوز03۔جولائی2017ء) وفاقی وزیر خزانا اسحاق ڈار نے پاناما کیس دی جے آئی ٹی ساہمنے اپنا بیان ریکارڈ کروا دتا اے۔ اوہناں دا کہنا سی کہ اج پہلا نوٹس ملیا جہدے اُتے پیش ہویا واں، مریم نواز دا قصور کیہ اے؟ مریم نواز دی پیشی دی بجائے سوال نامہ گھلیا جائے، نیازی سروسز وچ عمران خان دیاں بھیناں نوں بُلایا جائے، وزیر اعظم دا پاناما پیپرز وچ ناں نہیں ایس لئی ایہ تماشا بند ہونا چاہیدا، عمران خان نوں اپنے گریبان وچ ویکھنا چاہیدا، عمران لئی کیلی فورنیا دا کیس ای بتھیرا اے، جھوٹھ دی سیاست اُتے عمران خان نوں شرم آنی چاہیدی، افتخار چودھری خلاف مشرف نے کیس بنایا، معزز ججاں نے آمریت دا کیس آکھ کے سُٹ دتا۔
اوہناں نے پاناما کیس دی جے آئی ٹی ساہمنے پیشی مگروں میڈیا نال گل بات کردے ہوئے آکھیا کہ میں چارٹرڈ اکاﺅنٹنٹ آں۔ سارے پُچھے گئے سوالاں دے جواب دے دتے۔ سارے معاملات شفاف نیں۔ اک اک پیسے دا حساب دے دتا۔ کوئی وی نواز شریف تے میرے اُتے کرپشن ثابت کر کے نہیں وکھا سکدا۔ اسحاق ڈار دا کہنا سی کہ وزیر اعظم دا ناں کسے وی تھاں پاناما پیپرز وچ نہیں اے۔
نواز شریف خلاف کوئی کیس نہیں ایس لئی تماشا بند ہونا چاہیدا۔ وزیر اعظم دے ذاتی کاروبار نوں نقصان پہنچا یا جا رہیا اے۔ جہناں دے پاناما پیپرز وچ ناں نہیں اوہ دوجیاں جماعتاں وچ سیاست کر رہے نیں۔ اوہناں نے آکھیا کہ 23سال توں ایس ملک وچ تماشا لگا ہویا اے کُجھ سیاسی ساتھی ہر ویلے تماشا لاندے نیں۔ جو یفرنسز بنائے گئے اوہ بدنیتی تے جھوٹھ دی بنیاد اُتے بنائے گئے سن۔
