اسلام آباد(پاکستان پوائنٹ نیوز09۔جون2017ء) وزیر اعظم نواز شریف دے پُتر حسین نواز نے دو ٹوک لفظاں وچ آکھیا اے کہ جے آئی ٹی نوں جے کوئی ثبوت ملدا اے تے فیر ضرور ایکشن ہونا چاہیدا، انشاءاللہ اوہناں نوں کوئی ثبوت نہیں ملے گا، شک دی بنیاد اُتے فیصلے نہیں ہوندے، شک توں بچنا چاہیداکیونکہ شک اک شیطانی عمل اے، جے آئی نے فیر بُلایا تے ضرورآواں گا، الیکشن لڑن دا کوئی ارادا نہیں، حسن نواز دا گل نہ کرنا ذاتی فیصلا ہو سکدا اے۔
اوہناں نے پاناما کیس دی جے آئی ٹی ساہمنے 5ویں پیشی مگروں میڈیا نال گل بات کردے ہوئے آکھیا کہ پارٹی کارکناں دی محبت دا شکر گزار آں۔ میڈیا دے نمائندیاں نوں خراج تحسین پیش کرنا واں کہ سچ پہنچان لئی اوہ جس طرحاں اینی دیر تیک دھپ وچ کھلوتے رہندے نیں۔ اک سوال دے جواب وچ اوہناں نے آکھیا کہ اوتھے کوئی سی سی ٹی وی کیمرا نہیں اے۔ اوہناں نے آکھیا کہ اج میری 5ویں پیشی سی۔
پر اگلی 6ویں پیشی لی سمن جاری نہیں کیتا۔ اج پُچھے گئے سوالاں دی نوعیت توں لگدا نہیں کہ فیر بُلایا جائے گا۔حسین نواز نے واضح کیتا کہ الیکشن لڑن دا کوئی ارادا نہیں۔ حسن نواز دا میڈیا نال گل بات نہ کرنا ذاتی فیصلا سی۔اوہناں دا کہنا سی کہ کارروائی توں میں مطمئن نہیں ہونا بلکہ اوہناں نے ہونا اے ایہ سوال اوہناں کولوں پُچھوں۔ انشاءاللہ کوئی ثبوت نہیں ملے گا کیونکہ کوئی ثبوب ہے ای نہیں۔ اوہناں نے آکھیا کہ جے آئی ٹی نوں جے کوئی ساڈے خلاف ثبوت ملدا اے تے فیر ضرور ایکشن ہونا چاہیدا۔
