لاہور(پاکستان پوائنٹ نیوز02۔مئی2017ء) وزیر اعظم میاں محمد نواز شریف نے آکھیا اے کہ اج دا جلسہ مینوں 2018دے الیکشن وچ جِت دی خشخبری سنا رہیا اے، مخالفاں دا ایجنڈا جھوٹھ بولنا، الزام لانا تے تخریب کاری اے، لیہ توں تونسہ پل دی اُساری 700کروڑ، چوک اعظم لئی گیس تے ہیلتھ کارڈ دین دا اعلان، لیہ وچ مخالف امیدوار دی ضمانت ضبط ہو جائے گی، میرے کارکن شیر نیں جدکہ مخالف گیڈر نیں، 100گیڈر وی آ جان تے شیر اکلا اپنی تھاں کھلوتا رہندا اے۔
تفصیل دے مطابق اج لیہ وچ جلسے نال خطاب کردے ہوئے وزیر اعظم دا کہنا سی کہ 2013دے انتخابات وچ لیہ نے مخالفاں نوں رد کرد ے ہوئے سانوں ووٹ دتا۔ اوہناں دا کہنا سی کہ اج دا جلسہ مینوں 2018دے الیکشن وچ جت دی خشخبری سنا رہیا اے، لیہ والیاں دا جذبا کیتے ہور ویکھن نوں نہیں ملدا، پاکستان بھر وچ لیہ لیہ ہو رہی اے،ایہ جلسہ مخالفاں دیاں جلسیاں توں وڈا جلسہ اے۔
مخالفاں دیاں 10جلسیاں وی ایہدے وچ سما جان گیاں، سوشل میڈیا اُتے مخالفاں دے اسلام آباد جلسے دیاں جھلکیاں ویکھیاں سن، مخالف وڈے وڈے بلب لا کے دھوکھا دیندے نیں، مینوں نظر آ رہیا اے کہ آخری بندہ کنی دور بیٹھا ہویا اے۔ اوہناں دا اپنے خطاب وچ کہنا سی کہ میرا 2013والا جذبا ٹھنڈانہیں ہویا اج اسیں اک ہور خشحالی دا پروگرام لے کے آئے آں۔ نواز شریف نے آکھیاکہ میں لوڈشیڈنگ دی لعنت نوں ختم کرن دا وعدا کیتا سی۔
ہن اک اک کر کے سارے کارخانے بجلی دینا شروع کر رہے نیں۔ اوہناں دا کہنا سی کہ بھکھی ، بلوکی، قادر آباد، پوسٹ قاسم، نیلم جہلم تے تربیلا فیورٹ ورگے منصوبیاں راہیں اگلے سال 10ہزار میگا واٹ بجلی سسٹم وچ آ جائے گی۔ وزیر اعظم نے ایس موقعے اُتے آکھیا کہ اسیں کساناں نوں سستی بجلی دین دی کوشش کراں گے، کساناں لئی کھاد نوں سستا کیتا، ٹیوب ویل دی بجلی نوں وی سستا کراں گے۔ اوہناں نے آکھیاکہ پاکستان وچ تھاں تھاں موٹرویز تے سڑکاں بن رہیاں نیں، فاصلے گھٹ رہے نیں۔ لیہ توں انڈس ہائی وے تک ہن ادھا گھنٹہ لگے گا۔
