شیخوپورہ(پاکستان پوائنٹ نیوز19۔اپریل2017ء) وزیر اعظم میاں محمد نواز شریف نے آکھیا اے کہ لوڈشیڈنگ دے ذمے وار ای احتجاج دی دھمکی دے رہے نیں، شرم کرو! اج قوم تہاڈا بیج گڈھیا ای وڈھ رہی اے، دریاواں تے ڈیماں وچ پانی دی کمی لوڈشیڈنگ دی وڈی وجہ اے، بجلی دی لوڈشیڈنگ دے ذمے واراں خلاف کارروائی کراں گے، ہر دو مہینیاں مگروں بجلی پاور پلانٹ دا افتتاح کراں گے، انتہا پسندی تے دہشت گردی دا لک ٹٹ رہیا اے، روز دھرنے کرن تے جھوٹھ بولن والے الیکشن ہار جاندے نیں، الزام لان دی سیاست ختم نہ کیتی تے تُسیں ختم ہو جاﺅ گے۔
اج شیخوپورہ وچ بھکھی پاور پلانٹ دی افتتاحی تقریب نال خطاب دوران وزیر اعظم نے آکھیا کہ 18مہینے پہلے ایس منصوبے دی نینہ رکھی گئی منصوبے دی تکمیل نال پاکستان دی تاریخ وچ اک نویں باب دا وادھا ہویا اے، جتھے بھکھی منصوبا ریکارڈ مدت وچ مکمل ہویا ہویا اے۔ 18مہینیاں وچ تے گھر نہیں بندا پر اسیں اینا وڈا منصوبا بنایا اے، جے پہلے ایہ خیال کیتا جاندا تے پاکستان مالی کسارے وچ نہ جاندا تے نہ ای ملک ڈیفالٹ ڈکلیئر ہون نیڑے پہنچدا۔
وزیر اعظم نے اپنے خطاب وچ آکھیا کہ نیلم جہلم، نندی پور تے لواری ٹنل ورگے منصوبے40ورھیاں توں مکمل نہیں ہوئے ،لوڈشیڈنگ دے ذمے وار ای احتجاج دی دھمکی دے رہے نیں، احتجاج کرن دی دھمکی اوہ لوک دے رہے نیں جہناں نے ملک نوں انھیریاں وچ ڈوبن دی بنیاد رکھی۔ شرم آنی چاہیدی اج تہاڈے لوکاں دا گڈھیا بیج ای قوم وڈھ رہی اے جے تسیں جذبہ حب الوطنی نال کم کردے تے اج ایہ دن نہ ویکھنا پیندا۔
