کراچی(پاکستان پوائنٹ نیوز19۔اپریل2017ء) شریک چیئرمین پیپلز پارٹی آصف زرداری نے آکھیا اے کہ پاناما فیصلا نواز شریف خلاف آیا تے اوہنوں من لینا بہتر ہووے گا، نواز شریف کول بڑے لوک نیں اوہ کسے نوں وی وزیر اعظم بنا سکدے نیں، پاناما اُتے احتجاج جمہوریت لئی چنگا نہیں ہووے گا، حکومت دے خاتمے تک تحریک چلاواں گے، بی بی دے دور وچ اشتہار چلدے سن کہ بجلی آئی اے، نواز شریف توں بہتر مینجمنٹ کر سکناں واں۔
میڈیا رپورٹس دے مطابق آصف علی زرداری نے وزیر اعظم نواز شریف دے خطاب اُتے ردعمل دا وکھالا کرد ے ہوئے آکھیا کہ ساڈے دور وچ نواز شریف نے بجلی نہ آن اُتے بڑھکاں ماریاں پر اسیں بے نظیر دے دور وچ کِنے ای بجلی منصوبے سائن کیتے سن۔ بی بی دے دور وچ اشتہار چلدے سن کہ بجلی آئی اے۔ اوہناں نے آکھیا کہ سوچ سمجھ کے گل کرنی چاہیدی، ہن تے کساناں کول پانی ہے نہ ای بجلی۔
نواز شریف سستا تیل ملن مگروں وی سستی بجلی نہیں دے رہے۔ زرداری نے آکھیا کہ حکومت دے خاتمے تک تحریک چلاواں گے۔ وفاق جھیڑیاں نوں سیاسی معاملے بنان دی کوشش کر رہیا اے۔ اوہناں نے آکھیا کہ پاناما کیس دے فیصلے دابڑی اُڈیک اے۔ پاناما دی سوشل میڈیا اُتے بڑی کمنٹری ہوئی اے۔ نواز شریف دی کسے وی فیصلے نوں منن دی عادت نہیں۔
