نویں دِلی(پاکستان پوائنٹ نیوز24۔مارچ2017ء) بھارتی حکومت نے دعوا کیتا اے کہ پچھلے ورھے ستمبر وچ بھارتی فورسز ولوں آزاد کشمیر وچ سرجیکل سٹرائیکس کرن مگروں لائن آف کنٹرول تے بین الاقوامی سرحد اُتے ہون والی جنگ بندی دیاں خلاف ورزیاں وچ کمی ہوئی اے۔ بھارتی اخبار دے مطابق وزیر مملکت برائے داخلا امور ہنس راج گنگا رام دے مطابق سرجیکل سٹرائیکس مگروں پاکستان ولوں جنگ بندی دیاں خلاف ورزیاں وچ کمی ہوئی اے، 2016دے دوران لائن آف کنٹرو ل اُتے 228وار جنگ بندی دی خلاف ورزی کیتی گئی جدکہ بین الاقوامی سرحد اُتے خلاف ورزیاں دی گنتی 221رہی پر فروری 2017تک پاکستان ولوں جنگ بندی دی خلاف ورزی دے 22واقعات ساہمنے آئے تے بین الاقوامی سرحد اُتے صرف 6وار اجیہے واقعات ہوئے۔
وزیر مملکت دا کہنا سی کہ 2017وچ ہون والیاں خلاف ورزیاں وچ ہلاک تے زخمی ہون والے شہریاں دی گنتی صفر رہی جدکہ 2016وچ لائن آف کنٹرول اُتے 83شہری زخمی تے 13ہلاک ہوئے۔ اوہناں دا ہور کہنا سی کہ 2016وچ بین الاقوامی سرحد اُتے زخمی ہون والے شہریاں دی گنتی 74تے ہلاک ہون والے شہریاں دی گنتی 8رہی جدکہ بارڈر سکیورٹی فورس دے 5جون ہلاک تے 25زخمی ہوئے سن۔ اودھر وزیر داخلا راج ناتھ دا کہنا سی کہ سرجیکل سٹرائیکس مگروں ہون والیاں دہشت گردی دیاں کارروائیاں دی گنتی 87سی، ایہناں حملیاں وچ پہلے 34سکیورٹی اہلکار ہلاک ہوئے سن پر بعدوں ہون والیاں موتاں دی گنتی 19سی جدکہ پہلے شہریاں دے ہلاک ہون دی گنتی 7سی جو بعدوں 6 ہو گئی۔
مذاکرات دی دوبارا شروعات کرن دی ذمے واری پاکستان اُتے پاﺅندے ہوئے وزیر داخلا دا کہنا سی کہ پاکستان نوں سرحد پار دہشت گردی بند کرنی چاہیدی۔ اوہناں نے ہور آکھیا کہ پاکستان نوں دہشت گرد کارروائیاں دے خاتمے لئی مذاکرات وچ پہل کرنی چاہیدی۔
