ساڈے کسے نمائندے نے اسلام آباد دا دورا کیتا نہ ای کسے عہدیدار نال ملاقات کیتی: ترجمان افغان طالبان

ساڈے کسے نمائندے نے اسلام آباد دا دورا کیتا نہ ای کسے عہدیدار نال ملاقات کیتی: ترجمان افغان طالبان

اسلام آباد(پاکستان پوائنٹ نیوز24۔مارچ2017ء) طالبان ترجمان ذبیح اللہ مجاہد نے میڈیا رپورٹس نوں رد کردے ہوئے آکھیا اے کہ ساڈے کسے نمائندے نے اسلام آباد دا دورا نہیں کیتا ، نہ ای اوہناں نے اوتھے کسے عہدیدار نال ملاقات کیتی، جے ماسکو اجلاس وچ رلت دی دعوت دِتی گئی تے اوہدے اُتے غور کراں گے، طالبان افغان حکومت نوں کٹھ پتلی حکومت قرار دیندے نیں۔

تفصیل دے مطابق افغان طالبان دے مرکزی ترجمان ذبیح اللہ مجاہد نے امریکی نشریاتی ادارے نوں دِتے گئے انٹرویو وچ دسیا کہ اسیں میڈیا دی طالبان نمائندیاں نال اسلام آباددا دورا کرن دی رپورٹ نوں رد کردے آں کیونکہ نہ تے ساڈے کسے نمائندے نے اسلام آباد دا دورا کیتا تے نہ ای اوہناں نے اوتھے کسے عہدیدار نال ملاقات کیتی پر اوہناں نے واضح طور اُتے ایہناں اطلاعواں نوں رد نہیں کیتا کہ جے افغان طالبان نوں ماسکو وچ ہون والے اجلاس وچ رلت دی دعوت دِتی گئی تے اوہ اہدے وچ رلت کرن گے۔

ذبیح اللہ مجاہد نے آکھیا کہ جدوں سانوں دعوت دِتی جائے گی تے فیر ای اسیں اوہدے اُتے غور کر سکدے آں۔ طالبان دے ترجمان نے ایہ گل امریکی خبر رساں ادارے ایسوسی ایٹیڈ پریس دی اک رپورٹ دے اک دن بعد آکھی جہدے وچ ایہ دعوا کیتا گیا سی کہ پاکستانی عہدیداراں نے اسلام آباد وچ 7طالبان رہنماواں دی مجمانی کیتی تے ایہ سبھ کرن دا مقصد طالبان اُتے دباءپانا سی کہ اوہ افغان حکومت نال امن مذاکرات وچ شامل ہون۔

چیتے رہوے کہ پاکستان نے جولائی 2015وچ افغان طالبان تے افغان حکومت دے نمائندیاں وچکار مذاکرات دی مجمانی کیتی سی پر ایس دوران طالبان دے بانی رہنما ملا عمر دی موت دی خبر ساہمنے آن مگروں ایہ مذاکراتی عمل تعطل دا شکار ہو گیا۔ پاکستانی حکومت دے اعلا عہدیدار تے اک انٹیلی جنس عہدیدار نے وی او اے نوںد سیا کہ اوہ اجیہے دورے یاں گل بات توں جانو نہیں نیں۔