اسلام آباد(پاکستان پوائنٹ نیوز15۔مارچ2017ء) الیکشن کمیشن آف پاکستان نے الیکشن وچ جدید ٹیکنالوجی ورتن لئی 100بائیو میٹرک ویری فکیشن مشیناں مُل لین دے سمجھوتے اُتے دستخط کر دِتے نیں، سمجھوتے دے تحت میسرز سیکیورٹیک نامی کمپنی آن والے 70دناں وچ جدید بائیو میٹرک مشیناں دیوے گی جہناں نوں آن والے ضمنی الیکشن وچ تجربے دے طور اُتے ورتیا جائے گا، مشیناں اُتے 1کروڑ 60لکھ رُپئے خرچا آئے گا۔
بدھ دے دیہاڑے الیکشن کمیشن آف پاکستان وچ بائیو میٹرک ویری فکیشن مشیناں مُل لین دے سمجھوتے اُتے دستخط دی تقریب دا آہر کیتا گیا، ایس موقعے اُتے میڈیا نال گل بات کردے ہوئے سیکرٹری الیکشن کمیشن نے دسیا کہ الیکشن کمیشن نے بائیو میٹرک مشیناں مُل لین لئی پچھلے ورھے قومانتری سطح اُتے ٹینڈر جاری کیتے سن تے کئی ملکی و غیر ملکی کمپنیاں نے اوہدے وچ حصہ لیا سی۔
اوہناں نے دسیا کہ الیکشن کمیشن نے الیکٹرانک ووٹنگ تے بائیو میٹرک مشیناں مُل لین لئی ٹینڈر جاری کرن دے نال نال پارلیمنٹ دی انتخابی اصلاحات کمیٹی سنے مختلف سٹیک ہولڈراں نال مشورا جاری رکھیا جہدے مگروں الیکٹرانک ووٹنگ تے بائیو میٹرک مشیناں مُل لین دے سمجھوتے کیتے گئے نیں۔ اوہناں نے دسیا کہ پہلے 150الیکٹرانک ووٹنگ تے 100بائیو میٹرک مشیناں مُل لین لئی سمجھوتا کیتا گیا اے ، مشیناں آن والے 10ہفتیاں دوران دِتیاں جان گیاں تے مجموعی طور اُتے ایہناں مشیناں اُتے 3کروڑ 50ہزار رُپئے خرچا آئے گا۔
اوہناں نے آکھیا کہ ایہناں مشیناں دی سپلائی مگروں فوری طور اُتے ایہناں نوں آن والے ضمنی الیکشن وچ تجربے دے طور اُتے ورتیا جائے گا تاں جے دی کارکردگی دا پتا چل سکے۔ اوہناں نے آکھیا کہ تجرباتی طور اُتے ایہ مشیناں نوں پارلیمنٹ ہاﺅس تے پریس کلباں وچ ورتیا جائے گا۔
