راولپنڈی(پاکستان پوائنٹ نیوز09۔مارچ2017ء) چیف آف آرمی چیف جنرل قمر جاوید باجوہ نے کور کمانڈر کانفرنس دی صدارت کیتی، جہدے وچ ملک نوں پیش اندرونی و بیرونی چیلنجاں تے امن وامان دی صورتحال اُتے وچار وٹاندار کیتا گیا۔ آئی ایس پی آر دے مطابق آرمی چیف جنرل قمر جاوید باجوہ دی صدارت ہیٹھ اج جی ایچ کیو راولپنڈی وچ کور کمانڈر کانفرنس دوران فوج دی پیشہ ورانا تے آپریشنل تیاریاں اُتے اطمینان دا وکھالا کیتا گیا۔
کور کمانڈر کانفرنس وچ نیشنل ایکشن پلان، ملٹری کورٹس، افغان بارڈر دی صورتحال، پاک بھارت لائن آف کنٹرول تے ورکنگ باﺅنڈری سنے داعش تے ڈان لیکس دے معاملے اُتے وی غور کیتا گیا۔ کانفرنس وچ جیو سٹرٹیجک صورتحال اُتے وی وچار وٹاندرا کیتا گیا۔ کانفرنس دے رلتیاں نے اتفاق کیتا اے کہ پاک فوج ملک دی سلامتی دا ہر قیمت اُتے دفاع کرے گی۔ فوجی عدالتاں دے قیام دا حتمی فیصلا حکومت ای کرے گی، فوج آدم شماری نوں قومی خدمت دے طور اُتے انجام دیوے گی، 6ویں آدم شماری لئی سارے وسائل ورتے جان گے۔
آپریشن ’ردالفساد‘ وچ پاک بحریا تے پاک فضائیا دے کردار دی وی تعریف کیتی گئی۔ آرمی چیف نے آکھیا کہ سی پیک خلاف دشمناں دی ہر سازش ناکام بنا دِتی جائے گی۔ دہشت گردی دے خاتمے لئی لوکائی تے فورسز دیاں قربانیاں نوں ضائع نہیں جان دِتا جائے گا۔ قمر جاوید باجوہ نے آکھیا کہ آپریشن ردالفساد کسے خاص نسل، فرقے یاں گروپ خلاف نہیں اے۔ آپریشن ردالفساد دے نتیجے وچ بغیر رنگ و نسل دہشت گرداں خلاف کارروائیاں کیتاں جان گیاں۔
