عدالتی حکم: وزیر داخلا دی سوشل میڈیا اُتے جھیڑے مواد خلاف حکمت عملی تیار کرن دی ہدایت

عدالتی حکم: وزیر داخلا دی سوشل میڈیا اُتے جھیڑے مواد خلاف حکمت عملی تیار کرن دی ہدایت

اسلام آباد(پاکستان پوائنٹ نیوز09۔مارچ2017ء) اسلام آباد ہائی کورٹ دے حکم مگروں وفاقی وزیر داخلا چودھری نثار علی خان نے سوشل میڈیا اُتے معزز ججاں دی کردار کشی نوں روکن تے جھیڑوا مواد چھاپن والیاں خلاف کارروائی لئی متعلقا حکام نوں 3 دن اندر جامع حکمت عملی تیار کرن دی ہدایت کر دِتی۔ میڈیا رپورٹس دے مطابق چودھری نثار علی خان نے وزارت داخلا دے عہدیداراں نوں ہدایتاں دِتیاں نیں کہ اوہ پاکستان ٹیلی کمیونیکیشن اتھارٹی (پی ٹی ای) نال رلکے اجیہا نظام بنان جہدے اُتے کسے نوں کوئی اعتراض نہ ہووے تے کوئی اوس نظام دی غلط ورتوں نہ کر سکے۔

وزارت داخلا ولوں جاری کیتے گئے بیان دے مطابق فیڈرل انویسٹی گیشن ایجنسی (ایف آئی ای) ولوں سوشل میڈیا اُتے اک اعلا عدالتی شخصیت دی جعلی تصویر راہیں بدنامی کیتے جان دے معاملے دی رپورٹ وزیر داخلا نوں پیش کیتی۔ بیان دے مطابق وزیر داخلا نے فیس بک ولوں جعلی تصویر پوسٹ کرن والے بندیاں بارے تفصیلاں دین توں انکار اُتے خفگی دا وکھالا کیتا جدکہ ایس معاملے اُتے امریکی حکومت نال وی رابطا کیتا گیا۔

وزیر داخلا دا کہنا سی کہ سوشل میڈیا اظہار رائے دی آزادی دی بجائے آزادی دے نال نال جھوٹھ دا پرچار کر رہیا اے تے افسوس نال کہنا پے رہیا اے کہ فیس بک انتظامیا تے امریکی حکومت نوں معاملے دی حساسیت دا پتا ای نہیں اے۔ اوہناں نے آکھیا کہ غیر ملکی کمپنیاں ولوںاظہار رائے دی آزادی دی پالیسی دے تحت نہ تے اعلا شخصیتاں نوں جھیڑوا بنان دی نہ تے اجازت دتی سکدی اے تے نہ ای کسے نوں کسے دی کردار کشی کرن لئی سوشل میڈیا دی ورتوں دا حق دِتا جا سکدا اے۔

وفاقی وزیر داخلا نے متعلقا عہدیداراں نوں ہدایت دتی کہ فیس بک، ٹوئٹر تے وائٹس ایپ دے مقامی ورژن متعارف کروان لئی سوشل میڈیا کمپنیاں نال رابطا کیتا جائے۔ اوہناں نے ایہ وی ہدایت کیتی کہ کسے وی بندے نوں جھیڑوا بنان بارے مواد دے کھلار نوں روکن لئی حکمت عملی بنائی جائے۔