اسلام آباد(پاکستان پوائنٹ نیوز08۔مارچ2017ء) سینیٹ دی قانون و انصاف تے مذہبی امور دی سانجھی کمیٹی نے وزارت قانون نوں ہدایت کیتی اے کہ ویاہ توں پہلے ایچ آئی وی تے تھیلیسمیا دے ٹیسٹ لازمی قرار دین دے حوالے نال بل نوں ری ڈرافٹ کر کے تن ہفتیاں اندر کمیٹی وچ پیش کرن دی ہدایت کر دِتی۔ تفصیل دے مطابق بدھ نوں کمیٹی دا اجلاس چیئرمین سینیٹر جاوید عباسی دی صدارت ہیٹھ پارلیمنٹ ہاﺅس وچ ہویا، اجلاس وچ کمیٹی ارکان سنے وزیر مملکت برائے صحت، سائرہ افضل تارڑ، وزارت مذہبی امور، وزارت انسانی حقوق تے وزارت قانون دے اعلا حکام نے رلت کیتی۔
اجلاس وچ ویاہ توں پہلے سکریٹنگ لئی فیملی لاز ترمیمی بل 2016اُتے غور کیتا گیا، خون دی سکریٹنگ لازمی قرار دین لئی ترمیمی بل مسلم لیگ (ن) دے سینیٹر چودھری تنویر خان نے سینیٹ وچ پیش کیتا، بل دے متن مطابق اوہناں نے مطالبا کیتا کہ ملک وچ ایچ آئی وی تے تھیلسیمیا دے روگ دی روک تھام لئی بلڈ سکریٹنگ نوںلازمی قرار دِتا جائے۔ سینیٹر چودھری تنویر خان نے آکھیا کہ ویاہ توں پہلے خون دی سکریٹنگ دے نتیجے وچ تھیلسیمیا تے ہور روگاں اُتے قابو پایا جاسکدا اے، خون دی سکریٹنگ نہ ہون کارن سالہوار خطرناک حد تک لوک بیماریاں دا شکار ہوندے نیں، ویاہ اُتے تے لکھاں رُپئے خرچا آﺅندا جے اک دو ہزار ٹیسٹ اُتے آ جائے گا تے کوئی حرج نہیں ہووے گا۔
ایس موقع اُتے چیئرمین کمیٹی سینیٹر جاوید عباسی نے آکھیا کہ ایہ بل پورے معاشرے لئی بہت اہم اے، تھیلیسمیا دی حد تک وزارت قانون مذہبی امور تے وزارت صحت توں ایس بل نوں ری ڈرافٹ کر کے منگیا سی۔ ایس موقعے اُتے وزارت مذہبی امور دے حکام نے آکھیا کہ اجے تک بل نوں ری ڈرافٹ نہیں کیتا، چھیتی ای کر لواں گے، ایس موقعے اُتے وزیر مملکت صحت سائرہ افضل تارڑ نے آکھیا کہ انج دا ای بل قومی اسمبلی وچ ڈاکٹر عذرا افضل پیش کر چکیاں نیں، دوویں بل اہم نیں ایہناں نوں اک کیتا جائے۔ جہدے اُتے چیئرمین کمیٹی سینیٹر جاوید عباسی نے وزارت قانون نوں بل ری ڈرافٹ کرکے پیش کرن دی ہدایت کردے ہوئے آکھیا کہ وزارت مذہبی امور نال مشورا کر کے وزارت قانون تن ہفتیاں وچ نواں بل ڈرافٹ پیش کرے۔
