لاہور(پاکستان پوائنٹ نیوز08۔مارچ2017ء) صوبائی وزیر قانون رانا ثناءاللہ نے وزیر اعلا خیبر پختونخوا پرویز خٹک دے لاہور آن نوں غیر قانونی قرار دیندے ہوئے آکھیا اے کہ اسیں چاہندے تے وزیر اعلا خیبر پختونخوا خلاف تعصب کِھلارن اُتے کارروائی کر سکدے ساں پر اسیں کے پی کے دے بھراواں نال رواداری دا سلوک چاہندے آں، وزیر اعلا خیبر پختونخوا تعصب کھلارن دا جرم کر چکدے نیں، تحریک انصاف والیاں کول انتشار کھلارن توں وکھ کوئی کم نہیں ، پنجاب وچ کسے وی پٹھان نے حکومت یاں پولیس خلاف احتجاج نہیں کیتا تحریک انصاف والے ایتھے آکے انتشار تے تعصب نوں ہوا دے رہے نیں۔
تفصیل دے مطابق پنجاب اسمبلی دے باہر میڈیا نال گل بات کردے ہوئے صوبائی وزیر قانون رانا ثناءاللہ نے آکھیا کہ وزیر اعلا کے پی کے نے لاہور وچ کُجھ لوکاں نال خطاب دے دوران جو گلاں آکھیاں اوہدے مگروں اوہدے مگروں اوہناں تعصب کھلارن دا جرم کیتا اے ، آئین و قانون دے تحت اوہناں کلاف کارروائی وی کیتی جا سکدی اے۔ اوہناں نے آکھیا کہ اسیں تعصب نہیں چاہندے، کے پی کے دے بھراواں نال رواداری دا سلوک چاہندے آں، اسیں عقل توں کم لے رہے آں جدکہ خیبر پختونخوا لیڈر شپ خطرناک کھیڈ ، کھیڈ رہی اے۔
اوہناں نے آکھیا کہ امیر مقام نے اک مثبت کم کیتا، ایتھوں تک کے پختونخوا دیاں تنظیماں نال رابطا کیتا تے مسئلیاں اُتے گل بات کیتی۔ رانا ثناءالہ دا کہنا سی کہ اسیں واضح کرنا چاہندے اں کہ پنجاب وچ پختون تے پنجابی بھراواں وانگ رِہ رہے نیں۔ اوہناں نے آکھیا کہ وزیر اعلا کے پی کے نے پنجاب دی لوکائی نوں بھیڈ بکریاں نال تشبیہ دِتی اے ایہو اوہناں دی سوچ اے۔
