لاہور(پاکستان پوائنٹ نیوز14۔فروری2017ء) وزیر اعظم محمد نواز شریف دی صدارت ہیٹھ امن و امان دی صورتحال بارے اعلا سطحی اجلاس ہویا، اجلاس دوران آپ مارو دھماکے دے نتیجے وچ پیدا ہون والی صورتحال دا جائزا لتا گیا، اجلاس وچ وزیر اعظم نوں لاہور دُکھانت بارے مڈھلی رپورٹ وی پیش کیتی گئی، وزیر عظم نے وزیر اعلا پنجاب کولوں لاہور دی سکیورٹی بارے تفصیلی رپورٹ منگ لئی۔
میڈیا رپورٹس دے مطابق وزیر اعظم نواز شریف دی صدارت ہیٹھ لاہور وچ اجلاس ہویا، اجلاس وچ فیصلا کیتا گیا کہ شہریاں دی جان و مال نوںتحفظ دین لئی سکیورٹی وچ کسے قسم دی کوتاہی نہ ورتی جائے۔ امن و امان اُتے کسے قسم دا کوئی سمجھوتا نہیں کیتا جائے گا، دہشت گرداں نوں شکست دین دے سوا کوئی دوجا راہ نہیں اے۔ پولیس نوں کارکردگی بہتر بنان لئی ٹریننگ دِتی جائے۔
وڈے شہراں دے داخلی تے خارجی رستیاں اُتے سکیورٹی یقینی بنائی جائے۔ وزیر اعظم نواز شریف نے خطاب کردے ہوئے آکھیا کہ دہشت گردی دا خاتما پہلی ترجیح اے۔ دہشت گردی دے واقعات نوں ہر صورت روکنا پئے گا۔ اوہناں دا کہنا سی کہ شہریاں دا ہر صورت تحفظ یقینی بنایا جائے۔ اوہناں نے آکھیا کہ امن دے قیام لئی ہر طرحاں دے اقدامات چُکے جا رہے نیں۔ نواز شریف نے آکھیا کہ دہشت گرداں تے سہولت کاراں خلاف بغیر کسے فرق کارروائی کیتی جائے۔
اجلاس دوران وزیر اعظم نے ہتھیار بند فوجاں تے قانون نافذ کرن والے اداریاں دیاں قربانیاں نوں وی سلاہیا۔ اوہناں نے آکھیا کہ دہشت گردی خلاف جنگ نوں انجام تک پہنچایا جائے گا۔ اجلاس وچ وزیرا علا پنجاب میاں محمد شہباز شریف، وزیر داخلا چودھری نثار علی خان، وزیر دفاع خواجا آصف ، چیف سیکرٹری پنجاب، آئی جی پنجاب پولیس سنے اعلا افسراں نے وی رلت کیتی۔ اجلاس مگروں وزیر اعظم نواز شریف لاہوروں اسلام آباد ٹُر گئے۔
