لاہور(پاکستان پوائنٹ نیوز14۔فروری2017ء) پچھلی رات لاہور مال روڈ چیئرنگ کراس نیڑے ہون والے دہشت گرد حملے وچ ڈی آئی جی ٹریفک کیپٹن (ر) سید احمد مبین شہید ہوئے۔ سید احمد مبین بارے دسیا جا رہیا اے کہ اوہ اک نہایت ایماندار تے حوصلے والے افسر سن۔ احمد مبین نے بلوچستان تے پنجاب وچ انسداد دہشت گردی دیاں کارروائیاں وچ اہم کردار ادا کیتا۔ سید احمد مبین کوئٹہ وچ پیدا ہوئے تے اوہناں نے مڈھلی تعلیم مستونگ کیڈٹ کالج توں حاصل کیتی۔
سید احمد مبین نے نومبر 1996وچ پولیس سروس جوائن کیتی۔ پولیس افسر ہون دے ناطے اوہناں دی پہلی تعیناتی اے ایس پی لاہور کینٹ دی حیثیت نال ہوئی۔ پاکستان آرمی وچ نوکری دوران 90دے دہاکے وچ احمد مبین نے رینجرز ولوں کراچی آپریشن وچ حصہ لیا۔ اوہناں نے پہلے رینجرز دی فیلڈ انٹیلی جنس ٹیم (ایف آئی ٹی) تے فیر فیلڈ سکیورٹی یونٹ (ایف ایس) وچ اپنے فرض نبھائے۔
اک سکیورٹی آپریشن دے دوران اوہناں نوں گولیاں وی وَجیاں۔ کراچی آپریشن دے دوران اوہناں دا کوڈ ناں ’کاکڑ‘ سی۔ بلوچستان پولیس وچ تعیناتی دے دوران احمد مبین نے کراچی وچ کئی اہم تے ہائی پروفائل اغوا برائے تاوان دے کیس حل کرن وچ کراچی پولیس دی مدد کیتی جہدے بعد 8اگست 2013نوں پولیس لائن کوئٹہ وچ اوہناں دے آپریشن برانچ دے ہم منصب ڈی آئی جی فیاض، جہناں نوں آپ مارو حملے وچ شہید کر دِتا گیا، دے قاتلاں دی نہ صرف نشان کاری کیتی بلکہ اوہناں نوں گرفتار کران وچ وی اہم کردار ادا کیتا۔
احمد مبین نے حساس اداریاں نال رلکے بلوچستان وچ انسداد دہشت گردی دے خفیہ آپریشنز کیتے جہناں وچ اوہناں نوں اہم کامیابیاں حاصل ہوئیاں۔ پنجاب پولیس وچ تعیناتی مگروں احمد مبین وزیر اعلا پنجاب میاں محمد شہباز شریف ریف دے مانیٹرنگ سیل دے ہیڈ وی بنے۔ اوہناں دی قابلیت وچ انسداد دہشت گردی دے آپریشنز دا واضح شمار کیتا جاندا سی۔ احمد مبین اپنے جواناں نال رلکے کم کردے سن۔ ویلفیئر دے کم کرن تے جواناں نال رلکے چنگا سلوک کرن اُتے جواناں وچ اوہناں دی مقبولیت ودھ رہی سی۔
