پیکے سکون نہ سوہرے:سوتیلے والد توں بچان لئی ماں نے دھی نوں گونگے ڈورے بندے نال ویاہ دتا

دیپالپور( پاکستان پوائنٹ نیوز02۔جون2018ء ) سوتیلے پیو توں بچان لئی ماں نے دھی نوں گونگے ڈورے بندے نال ویاہ دتا، سوتیلی دھی دے ویاہ اُتے پیو نے غصے وچ اوہدا پیر وی وڈھیا ۔معذور کُڑی جدوں اپنے گونگے ڈورے شوہر نال ویاہ کر کے اوہدی گھر گئی تے اوتھے سوہرے نے وی ظلم دی انتہا کردتی۔ ظالم سوہرا چُھرے نال اپنی نونہہ نوں دھمکاندا سی۔ ثانیہ نے اک ویڈیو ریکارڈ کرکے مشہور ٹی وی اینکر اقرار الحسن نوں گھلی جیہدے وچ اوہنے اپنے اُتے ہون والے ظلم دی کہانی بیان کیتی۔ ویڈیو وچ ثانیہ نے دسیا کہ میری عمر 22سال اے، میں پہلے لاہور وچ اپنے ماں پیو نال رہندی سی پر میرا والد سوتیلا سی۔ میر اوالد دس سال دی عمر وچ میرے نال مندا سلوک کردا سی سی، اجے تیکر وی انج ای ہوندا اے کہ میرے سوہریاں گھر آ کے مینوں ماردا اے تے میرے نال زبردستی کردا اے۔ذکر کیتی گئی ویڈیو وچ ثانیہ نے دسیا کہ میرے سوہرے وی میرے نال زبردستی کردے تے میری عزت نوں اُچھالدے نیں۔ جیہڑے بندے نال میرا ویاہ ہویا اوہ گونگا تے ڈورا اے۔ ویڈیو وچ ثانیہ نے اقرار الحسن توں اپیل کردے ہوئے آکھیا کہ مینوں ایتھوں کڈھ لوو کیونکہ میں ایتھے نہیں رہنا چاہندی۔ ثانیہ نے خفیہ کیمرے نال اپنے ظالم تے جنسی درندگی کرنو الے سوہرے دی کُجھ ویڈیو ریکارڈنگ وی کیتی، ثانیہ دے گھر وچ موجود اک سوانی نے وی دسیا کہ مینوں وی تن سال توں زیادتی دا نشانہ بنایا جا رہیا اے۔ جیہدے مگروں اقرار الحسن نے اپنی ٹیم نال ثانیہ دے سوہریاں اُتے دھاوا بولیا۔ ثانیہ دے سوہرے نے ساریاں ساہمنے ثانیہ نوں جھوٹھا تے اپنے آپ نوں سچا ثابت کرن دی کوشش کیتی۔ ظالم سوہر ے دی دوجی نونہہ نے وی اوہدیاں گندیاں حرکتاں دی گواہی دتی، جیہدے مگروں ثانیہ نوں اوہدے سوہرے توں رہا کروایا گیا۔