پشاور(پاکستان پوائنٹ نیوز23۔اکتوبر۔2018ء) پی ٹی آئی دی سوانی رہنما نازک بی بی نے شوہر اُتے فائرنگ کر دتی۔ پشاور وچ سوانی کونسلر دی فائرنگ نال اوہدا گھر والا زخمی ہو گیا، جیہدے مگروں اوہنوں علاج لئی ہسپتال منتقل کر دتا گیا اے۔ میڈیا رپورٹس مطابق پشاور دے علاقے فقیر آباد وچ ایہ دُکھ بھریا واقعہ اوس ویلے ساہمنے آیا جدوں گھریلو لڑائی دی وجہ توں پاکستان تحریک انصاف دی سوانی کونسلر نے فائرنگ کر کے اپنے شوہر نوں ڈاڈھا زخمی کر دتا، جیہنوں ڈاکٹری امداد لئی ہسپتال منتقل کر دتا گیا اے۔
جدکہ ملزمہ واردات مگروں فرار ہون وچ کامیاب ہو گئی۔ سید محمد طارق خان ولد امیر داد ساکن لطیف آباد نے زخمی حالت وچ بیان دیندے ہوئے آکھیا کہ گھریلو لڑائی دی وجہ توں اوہدی گھر والی نازک بی بی جو تحریک انصاف دی ٹاؤن ون دی کونسلر اے، اوہ رُس کے پیکے چلی گئی سی ۔ پچھلی رات گھر وچ موجود سی کہ ایس دوران اوہدی گھر والی اپنے رشتے دار احمد ولد مسعود ساکن گلبیار نال موٹر سائیکل اُتے آئی تے بولنا شروع کر دتا۔ جیہدے مگروں نازک بی بی نے پستول کڈھ کے میرے اُتے فائرنگ کر دتی۔ جیہدے نتیجے وچ میں ڈاڈھی زخمی ہوگیا۔ دوجے پاسے پولیس دا آکھنا اے کہ ملزماں نوں چھیتی گرفتار کر لیا جائے گا۔
