سرگودھا(پاکستان پوائنٹ نیوز10۔دسمبر۔2018ء) سرگودھا وچ شوروم دے مالک تے اوہدے ساتھی دے خلاف گن پوائنٹ اُتے سوانی نال زیادتی مگروں ویڈیو بناکے دھمکان دے الزام وچ مقدمہ درج کر لیا گیا۔ پولیس تھانا جھال پکیاں نے اک ملزم نوں گرفتار کرکے تفتیش شروع کر دتی اے۔ وسیلیاں دے مطابق منڈی بہاؤالدین دے علاقے مونا سیداں دی سوانی آسیہ پروین نے تھانا جھال چکیاں وچ مقدمے لئی درخاست دتی اے۔
سوانی نے درخاست وچ لکھیا کہ میں گھریلو سوانی تے گڈی دی مالک آں ۔ میں گڈی نوں ویچن لئی سرگودھا وچ گڈیاں دے شوروم دے مالک نذر کول آئی جیہنے گڈی مُل لین دے بہانے موضع ماڑی وچ موجود ڈیرے اُتے سدیا، جتھے پہلاں ای دو بندے موجود سن۔ایس موقعے تے اوتھے موجود بندیاں نے اسلحہ تان لیا تے ننگا کر کے اسلحے دے زور اُتے شوروم دے مالک نذر نے زیادتی دا نشانہ بنایا تے ویڈیو وی بنائی۔ سوانی نے اپنی درخاست وچ آکھیا کہ ملزم نے ڈرایا کہ جے کسے نوں دسیا تے ایہ ویڈیو سوشل میڈیا اُتے چلا دیواں گے۔ دوجے پاسے پولیس تھانا جھال چکیاں نے سوانی دی مدعیت وچ واقعے دا مقدمہ درج کرکے تفتیش شروع کر دتی۔پولیس دا آکھنا اے کہ اک ملزم نوں گرفتارکرلیااے جدکہ ہور دی بھال جاری اے۔
