لاہور دے علاقے ٹاؤن شپ توں میڈیکل دی طالبہ دی لاش برآمد

طالبہ مبینہ طور اُتے نشہ کردی سی تے اوہدی موت نشے دی زیادتی پاروں ہوئی:وسیلے

لاہور دے علاقے ٹاؤن شپ توں میڈیکل دی طالبہ دی لاش برآمد
طالبہ مبینہ طور اُتے نشہ کردی سی تے اوہدی موت نشے دی زیادتی پاروں ہوئی:وسیلے

لاہور(پاکستان پوائنٹ نیوز16۔نومبر۔2018ء) لاہور دے علاقے ٹاؤن شپ توں میڈیکل دی طالبہ دی لاش برآمد ہوئی اے۔ تفصیل مطابق ٹاؤن شپ دے علاقے وچ نجی ہاسٹل توں اک مشہور یونیورسٹی دی طالبہ دی لاش برآمد ہوئی، جیہدے اُتے شک دا اظہار کیتا جا رہیا اے کہ طالبہ مبینہ طور اُتے نشہ کردی سی تے اوہدی موت نشے دی زیادتی پاروں ہوئی۔پولیس نے لاش نوں پوسٹارٹم لئی گھل دتا اے۔

روزینہ نامی کُڑی سیالکوٹ دے واسی سائیں اختر دی دھی سی۔ 24سال دی روزینہ لاہور دی اک مشہور نجی یونیورسٹی وچ میڈیکل وچ پڑھ رہی سی تے اوہ لاہور دے اک نجی ہاسٹل وچ رہندی سی۔ اوہدی روم میٹ عروج گھروں واپس آئی تے اوہنے چابی نال فلیٹ دا بوہا کھولیا تے بوہا کھولدے ای عروج نے ویکھیا کہ روزینہ صوفے اُتے مردہ پئی اے،جیہدے مگروں عروج نے پولیس نوں اطلاع دتی۔

پولیس دے مطابق طالبہ دے جُثے اُتے تشدد دے نشان نہیں۔ تھانہ ٹاؤن شپ پولیس نے ہاسٹل دے مالک تے نالدے کمریاں وچ موجود کُڑیاں دے بیان لے لئے۔ پولیس نے روزینہ دے گھر والیاں نوں وی اوہدی موت بارے دسیا۔ پولیس دا آکھنا اے کہ روزینہ دی ساتھی روم میٹ عروج نے دسیاکہ روزینہ نشے دی عادی سی تے اوہدیاں بانہواں اُتے نشے دے ٹیکیاں دے نشان وی سن۔پر سچ پوسٹمارٹم تے فرانزک رپورٹس آن مگروں ای پتا چلے گا۔