لاہور دے چڑیا گھر وچ مرداں دے داخلے اُتے پابندی لگ گئی

لاہور(پاکستان پوائنٹ نیوز16۔اپریل2018ء) لاہور دے چڑیا گھر وچ مرداں دے داخلے اُتے پابندی لا دتی گئی اے۔ میڈیا رپورٹس مطابق فیملی توں وکھ مرداں نوں اکلے چڑیا گھر جان دی اجازت نہیں ہوئے گی۔ اکلے یاں بیلیاں نال آن والے مرد چڑیا گھر داخل نہیں ہو سکن گے۔ انتظامیہ دا کہنا اے کہ صرف فیملیاں نال آن والے مرداں نوں چڑیا گھر اندر جان دی اجازت دتی جا رہی اے۔ چڑیا گھر ساہمنے موجود پارکینگ سٹینڈ وی ختم کر دتا گیا اے جدکہ چڑیا گھر دی سکیورٹی دے انتظامات پہلے توں وی سخت کر دتے گئے نیں۔ ڈائریکٹر حسن سکھیرا نے آکھیا کہ ایہ فیصلا فیملیاں دیاں شکایتاں اُتے کیتا گیا اے۔