گوجرانوالا(پاکستان پوائنٹ نیوز15۔مارچ2018ء) گوجرانوالا وچ قتل دی دل نوں ہلا دین والی واردات دا انکشاف ہویا اے۔ گوجرانولا وچ چوری توں روکن اُتے بھرا نے بھرا نوں قتل کر کے لاش لوہا پگھلان والی بھٹھی وچ ساڑ دتی۔ تفصیل مطابق قتل دا ایہ واقعہ گوجرانوالا دے تھانہ کھیالی وچ پیش آیا جتھے انور نامی شہری نے اپنے دو پُتراں علی تے طیب دے لاپتا ہون دی رپورٹ لکھوائی سی۔
جدوں پولیس نے کارروائی کردے ہوئے نِکے بھرا نوں لبھیا تے اوہنے وڈے بھرا طیب نوں قتل کرن دا جرم قبول کر لیا۔ ملزم دے مطابق قتل دی واردات ویلے بھرا لوہے دی فیکٹری وچ موجود سن۔ طیب نے علی نوں لوہا چوری کردے ویکھیا تے ایس دوران دوویں بھراواں وچکار تلخی ہو گئی ۔ علی نے طیب نوں لوہے دا راڈ مار کے قتل کر دتا تے بعدوں اوہدی لاش نوں لوہے دی بھٹھی وچ ساڑ کے سوا کر دتا۔ پولیس نے بھٹھی توں لاش دیاں باقیات برآمد کر کے اوہنوں تجزیے لئی لیبارٹری گھل دتا اے۔
