واشنگٹن(پاکستان پوائنٹ نیوز14۔جنوری2017ء) نویں چُنے گئے امریکی صدر ڈونلڈ ٹرمپ ولوں متھے گئے وزیر دفاع جیمز میٹس نے الزام لایا اے کہ طالبان افغانستان وچ کارروائیاں لئی ہن وی پاکستانی زمین ورت رہے نیں،پاکستان نوں گوانڈھی ملکاں نال تعاون لئی ہور کم کرنے چاہیدے، اسلام آباد اُتے زور پانا چاہیدا کہ اوہ طالبان تے حقانی نیٹ ورک خلاف ہور اقدامات کرے، چُنیا گیا تے پاکستان اُتے ملک وچ موجود دہشت گرداں نوں کڈھن یاں ختم کرن اُتے زور دیواں گا، سکیورٹی امور دا نویں سِرے توں جائزا لواں گا۔
غیر ملکی میڈیا دے مطابق مِتھے گئے امریکی وزیر دفاع جیمز میٹس نے سینیٹ آرمڈ سروسز کمپنی وچ پاکستان بارے سوالنامے دا لکھتی روپ وچ جواب جمع کروا دِتا۔ جواب وچ جیمز میٹس دا کہنا سی کہ منتخب ہویا تے پاکستان نوں ملک وچ موجود دہشت گرداں نوں کڈھن یاں ختم کرن دی لوڑ اُتے زور دیواں گا، سکیورٹی بارے سارے امور دا نویں سِرے توں جائزا لواں گا۔
اوہناں دا کہنا سی کہ اوہ امریکا دی ڈومور پالیسی نوں برقرار رکھن گے۔ اوہناں نے آکھیا کہ خطرے اندر امریکی مقصداں بارے پاکستانی حکومت تے فوج وچ لمے چر تک سانوں عدم اعتماد دا ساہمنا رہیا اے۔ جیمز میٹس دا کہنا سی کہ پچھلے کُجھ ورھیاں توں پاکستان دہشت گردی خلاف جنگ امریکا نال رلکے لڑ رہیا اے۔ دہشت گردی خلاف جنگ وچ پاکستانی فوج نے ڈاڈھیاں قربانیاں دِتیاں۔ افغانستان بارے سوال دے جواب وچ اوہناں دا کہنا سی کہ خطے دے ملکاں نوں افغان طالبان تے ہور دہشت گرد گروپاں اُتے، پرتشدد مہم دے خاتمے لئی دباءودھانا چاہیدا۔
