ڈراے ،عامر کسے ویلے وی دھی نوں طلاق دے سکدا اے: والدین فریال مخدوم

ڈراے ،عامر کسے ویلے وی دھی نوں طلاق دے سکدا اے: والدین فریال مخدوم

لندن(پاکستان پوائنٹ نیوز28۔دسمبر2016ء)پاکستانی نژاد برطانوی باکسر عامر خان دی بیوی فریال مخدوم دے سوہریاں نال ہون والے جھیڑے وچ ہن فریال دے ماں پیو وی ساہمنے آ گئے نیں۔ تفصیل دے مطابق پاکستانی نژاد برطانوی باکسر عامر خان دے گھر والیاں تے بیوی فریال وچکار جھیڑا ختم ہون دا ناں ای نہیں لے رہیا جدکہ ہُن فریال دے ماں پیو وی دھی دی حمایت وچ میدان وچ آ گئے نیں۔

میڈیا نال گل بات کردے ہوئے فریال دی والدہ دا کہنا سی کہ اوہناں نے اپنی دھی دا ویاہ ہزاراں میل دور کیتا تے اوہدے سوہرےاں وچ ایڈجسٹمنٹ دی کوشش کیتی پر ہن ایسراں لگ رہیا اے کہ عامر دے ماں پیو اوہنوں قبول کرن نوں تیار نہیں نیں۔ عامر دے والد سجاد خان ولوں فریال نوں طلاق دِتے جان دے بیان اُتے اوہناں دی والدہ دا کہنا سی کہ جدوں دااوہناں نے ایہ بیان سُنیا اودوں توں ای اوہناں نوں نیندر نہیں آ رہی، اوہناں نوں ایہ خدشا اے کہ اوہناں دا جوائی کسے ویلے وی فریال نوں طلاق دے سکدا اے، عامر دے والد نوں سوچ سمجھ کے بیان دینا چاہیدا کیوں جے اوہناں دیاں اپنیاں وی دھیاں نیں۔

دوجے پاسے فریال دے والد دا کہنا سی کہ اوہناں دے خیال وچ عامر تے فریال بہت خش نیں، ایہ سس تے نوہ دا جھیڑا اے تے اوہ ایہدے اُتے کوئی وی بیان دینا ٹھیک نہیں سمجھدے۔ یادرہوے کہ ایس توں پہلے فریال نے الزام لایا سی کہ اوہدے سوہرے اوہدے اُتے تشدد کردے نیں تے اوہناں دی شادی برباد کرن اُتے تُلے ہوئے نیں۔