میلبورن(پاکستان پوائنٹ نیوز28۔دسمبر2016ء) پاکستان تے آسٹریلیا وچکار دوجے ٹیسٹ دے تیجے دیہاڑے اظہر علی دی شاندار ڈبل سنچری دے بعد گرین شرٹس نے اپنی پہلی اننگز 443سکور 9کھڈاری آﺅٹ اُتے ڈکلیئر کر دِتی جہدے جواب وچ کینگروز نے دن دے آخیر اُتے دو وکٹاں گوا کے 278سکور کر لئے نیں۔ تفصیل دے مطابق میلبورن کرکٹ گراﺅنڈ وچ کھیڈے جا رہے دوجے ٹیسٹ دے تیجے دیہاڑے پاکستان نے 310سکور 6وکٹاں گوا کے اپنی پہلی اننگز نوں دوبارا شروع کیتا تے اظہر علی 139تے محمد عامر 28سکور نال کریز اُتے موجود سن۔
بارش دی آوا جاوی وی لگی رہی جہدی وجہ توں کھیڈ وی متاثر ہویا، بارش ختم ہون دے بعد کھیڈ فیر شروع ہویا تے محمد عامر 29سکور بنا کے مچل سٹارک دا شکار بن گئے، سہیل خان نے اظہر علی نال 9ویں وکٹ اُتے108سکور کرن دے نال نال شاندار بلے بازی دا وکھالا کردے ہوئے 65سکور بنائے،جو بعد وچ میڈنسن ہتھوں رن آﺅٹ ہو گئے۔وہاب ریاض اظہر علی دا ساتھ دین وکٹ اُتے آئے پر اوہ وی اک سکور بنا کے ہیزل ووڈ دی گیند اُتے کیچ آﺅٹ ہو گئے، اظہر علی 205کرن دے نال ناٹ آﺅٹ رہے تے ایس طرحاںپاکستان نے اپنی پہلی اننگز 443سکور9کھڈاری آﺅٹ اُتے ڈکلیئر کر دِتی۔
