اسلام آباد(پاکستان پوائنٹ نیوز01۔دسمبر2016ء) پاکستان نوں 12ورھیاں بعد ڈیوس کپ ٹینس دی میزبانی دے مثبت اشارے مل گئے نیں۔ تفصیل دے مطابق پاکستان ٹینس فیڈریشن (پی ٹی ایف) دے سیکرٹری خالد رحمانی نے دسیا کہ انٹرنیشنل ٹینس فیڈریشن نے اگلے ورھے فروری وچ اسلام آباد وچ ایران خلاف ڈیوس کپ دی میزبانی دی اجازت دِتی اے۔ پاکستان وچ سکیورٹی خدشیاں پاروں بین الاقوامی ٹورنامنٹ وچ رلت لئی بہت گھٹ غیر ملکی ٹیماں ایتھے آئیاں۔
خالد رحمانی دا کہنا اے کہ اسیں ایس فیصلے دا خیرمقدم کردے آں ، اوہناں دا کہنا سی کہ ایس فیصلے دے نتیجے وچ ملک اندر ٹینس دی ودھوتری لئی مددوی ملے گی۔ یاد رہوے کہ 2009نوں لاہور وچ سری لنکن کرکٹ ٹیم دی بس اُتے ہون والے حملے دے بعد پاکستان وچ بین الاقوامی کرکٹ دے بوہے بند ہو گئے سن پر 2015وچ زمبابوے دی ٹیم نے تن ون ڈے تے اک ٹی ٹونٹی میچ کھیڈن لئی پاکستان دا دورا کیتا جو ہور ٹیماں نوں مطمئن کرن وچ ناکام رہیا۔
پی ٹی ایف دے سیکرٹری مطابق ہُن سکیورٹی دا مسئلا نہیں ہووے گا، اوہناں نے آکھیا کہ سکیورٹی بہتر ہوئی اے، پی ٹی ایف نے کسے وی غیر ملکی صدر نوں دِتی جان والے سکیورٹی دے برابر انتظامات کیتے نیں۔ اوہناں نے آکھیا کہ پاکستان نے پچھلے دِنا ای اسلام آباد وچ سکواش دے تن بین الاقوامی ٹورنامنٹ دی میزبانی کیتی اے تے ہن صورتحال بہتر اے۔ اوہناں دا کہنا سی کہ ایران خلاف گروپ 2مقابلے 3فروری توں 5فروری تیک اسلام آباد وچ ہون گے۔
