دبئی(پاکستان پوائنٹ نیوز08۔فروری2017ء) پاکستان سپر لیگ دے چیئرمین نجم سیٹھی دا کہنا اے کہ چالو ورھے دے ایونٹ دی افتتاحی تقریب وچ اک سرپرائز رکھیا گیا اے۔ تفصیل دے مطابق دبئی وچ گلوکار شیگی، شہزاد رائے تے علی ظفر نال پریس کانفرنس کردے ہوئے نجم سیٹھی دا کہنا سی کہ اوہناں نوں امید اے کہ چالو ورھے پی ایس ایل پہلے توں زیادا کامیاب ہووے گی۔ اوہناں دا کہنا سی کہ افتتاحی تقریب دے حوالے نال زیادا کُجھ نہیں دَساں گا پر اینا ضرور آکھاں گے کہ اوہدے وچ اک سرپرائز رکھیا گیا اے۔
پاکستان سپر لیگ دے سفیر رمیز راجا دا کہنا سی کہ سبھ توں زیادا وکٹاں لین والے کھڈاری نوں پریل کیپ تے سبھ توں زیادا سکور کرن والے نوں گرین کیپ دیاں گے۔ اوہناں دا کہنا سی کہ غیر ملکی کھڈاری وی پی ایس ایل بارے پرجوش نیں، امید اے پی ایس ایل وچ سنسنی خیز مقابلے ہون گے۔ ایس موقعے اُتے گلوکار و اداکار علی ظفر نے آکھیا کہ مینوں خشی اے کہ پی ایس ایل نے مینوں کُجھ کرن دا موقع دِتا اے، کرکٹ ہمیشہ توں ای میرا پسندیدا کھیڈ رہیا اے۔ شہزاد رائے دا کہنا سی کہ پی ایس ایل دی وجہ توں پاکستان دا امیج اُچا ہویا اے۔
