سڈنی(پاکستان پوائنٹ نیوز06۔جنوری2017ء) تیجے ٹیسٹ دے چوتھے دیہاڑے پاکستان نے آسٹریلیا دے 465سکور دے جواب وچ دن دے آخیر اُتے 1وکٹ دے نقصان اُتے 55سکور کر لئے۔ پاکستانی ٹیم ولوں اظہر تے شرجیل خان نے اننگز دی شروعات کیتی تے سیریز وچ پہلی وار 50سکور دی اوپننگ پارٹنر شپ بنائی۔ شرجیل خان 40سکور کرن دے بعد لیون دا شکار بنے، دن دے آخیر اُتے اظہر علی 11تے یاسر شاہ 3سکور کر کے کریز اُتے موجود سن۔
ایس توں پہلے کینگروز نے 223سکور دی برتری حاصل کرن مگروں پاکستان نوں فالو آن کران دی بجائے آپ بیٹنگ کردے ہوئے 2وکٹاں دے نقصان اُتے 241سکور بنا کے دوجی اننگز ڈکلیئر کر دِتی۔ مجمان اوپنر ڈیوڈ وارنر نے تیز کھیڈدے ہوئے صرف 23گینداں اُتے ففٹی سکور کیتا، اوہناں ولوں 55سکور کرن دے بعد وہاب ریاض نے ڈیوڈ نوں بولڈ کیتا، سٹیو سمتھ 58سکور کر کے یاسر شاہ ہتھوں وکٹاں پچھوں کیچ آﺅٹ ہوئے، مجمان ٹیم دا ٹوٹل دو وکٹاں اُتے 241تیکر پہنچایا تے کپتان نے اننگز ڈکلیئر کرن دا اعلان کر دِتا، عثمان خواجا 79تے پیٹر بینڈ سکومب 40سکور کر کے ناٹ آﺅٹ رہے۔
سڈنی کرکٹ گراﺅنڈ وچ جاری ٹیسٹ دے چوتھے دن دا کھیڈ وی بارش پاروں دیر نال شروع ہویا، پاکستان نے اپنی پہلی نامکمل اننگز 271سکور 8کھڈاری آﺅٹ توں شروع کیتی تے اوہنوں فالو آن توں بچن لئی 67سکور چاہیدے سن۔ یونس خان آسٹریلین باﺅلرز دا ڈٹ کے مقابلا کردے رہے پر نیل اینڈرز سینئر بلے باز دا ساتھ نہ دے سکے، یاسر شاہ 10سکور بنا کے سلپ وچ کیچ دے بیٹھے تے ایسے ای اوور وچ عمران خان وی کلین بولڈ ہو گئے جدکہ یونس خان 175سکور نال ناٹ آﺅٹ رہے۔ آسٹریلیا ولوں ہیزل ووڈ نے چار، نیتھن لیون تن جدکہ مچل سٹارک تے سٹیو اوکیف نے اک اک کھڈاری نوں آﺅٹ کیتا۔
