نویں دِلی(پاکستان پوائنٹ نیوز02۔جنوری2017ء) بھارتی سپریم کورٹ نے انڈین کرکٹ بورڈ دے صدر انوراگ ٹھاکر تے سیکرٹری اجے شر نوں عہدے توں ہٹا دِتا۔ تفصیل دے مطابق چیف جسٹس ٹی ایس ٹھاکر دی سربراہی وچ کیس دی سنوائی دے دوران اعلا عدالت نے لودھا پینل دیاں سفارشاں اُتے عمل نہ کرن دی وجہ توں بی سی سی آئی دے صدر تے سیکرٹری نوں عہدے توں ہٹان دا فیصلا سنایا۔
ہندوستانی سپریم کورٹ نے بی سی سی آئی نوں لودھا کمیشن دیاں سفارشاں اُتے عمل کرن دی ہدایت کیتی سی تے عدالت نے حکم جاری کیتا سی کہ ٹیسٹ میچاں دی میزبانی کرن والیاں ریاستاں نوں فنڈز جاری کرن توں پہلے بورڈ نوں ایس انتظامی معاملات دی تفتیش کرن والے اُچیچے پینل توں منظوری لینی پئے گی۔ نومبر وچ ایہ معاملا اوس ویلے وِگڑ گیا جدوں بی سی سی آئی نے انگلینڈ خلاف ٹیسٹ میچ شروع ہون توں کجھ گھنٹے پہلے دھمکی دِتی سی کہ جے عدالت نے مالی معاملات دی ادائیگی اُتے پابندی دے فیصلے نوں واپس نہ لیا تے اوہ انگلینڈ خلاف پہلا ٹیسٹ میچ نہیں کھیڈن گے جہدے بعد سپریم کورٹ نے اوہناں نوں پیسیاں دی ادائیگی دی اجازت دے دِتی سی۔
عدالت ایہناں دوویں عہدےاں اُتے تقرری دے حوالے نال دو ہفتیاں بعد سنوائی وچ فیصلا سنائے گی پر اوس ویلے تیکر نائب صدر بورڈ دے معاملات چلان گے۔
