کھڈاری صدمے وچ نیں، اجے ایس حالت وچ نہیں کہ کھیڈ سکن: ندیم خان منیجر یو بی ایل کرکٹ ٹیم

کراچی(پاکستان پوائنٹ نیوز05۔دسمبر2016ء) کراچی دے ہوٹل وچ اگ لگن دے بعد قومی کرکٹ دے کھڈاری وی نشانا بنے۔ نجی ٹی وی نال گل بات کردے ہوئے یو بی ایل کرکٹ ٹیم دے منیجر ندیم خان نے دسیا کہ اوہ رات ساڈھے تن وجے ہوٹل پہنچ گئے سن، اوس ویلے کھڈاری پریشانی وچ رو رہے سن، چوتھے فلور توں کھڈاری مدد لئی بُلا رہے سن۔ ندیم خان نے دسیا کہ کئی کھڈاریاں دے پھیپھڑیاں وچ دھواں وی گیا۔

یاسم مرتضی دے چھال مارن پاروں اوہدی اَڈی وچ فریکچر ہویا، کرامت علی تے مہدی پھیپھڑیاں وچ دھواں جان پاروں متاثر ہوئے۔ ایس موقعے اوہناں نے دسیا کہ صہیب مقصود نے اک فیملی دی جان وی بچائی۔ صہیب مقصود نے ہوٹل دے کوریڈور وچ اک خاندان نوں پھسیا ویکھیا تے اوہناں دی مدد نہ پہنچ گئے۔ فیملی وچ بال وی شامل سن، اوہناں دی حالت ویکھ کے صہیب مقصود نوں جھٹکا لگا۔ فیملی نوں ریسکیو کرن دی وجہ توں صہیب نوں ڈاڈھی مشکل صورتحال دا ساہمنا رہیا۔ ندیم خان نے آکھیا کہ اللہ تعالی نے کرم کیتا کہ کھڈاری محفوظ رہے۔ اوہناںد ا کہنا سی کہ کھڈاری ایس ویلے کرکٹ نہیں کھیڈ سکدے۔ کھڈاریاں نے ہوٹل وچ موتاں ویکھیاں نیں جس پاروں اوہناں دی حالت اجے کھیڈن والی نہیں، ساڈے کھڈاری صدمے وچ نیں۔