ڈھاکا(پاکستان پوائنٹ نیوز02۔دسمبر2016ء) بنگلا دیش پریمئر لیگ اک وار فیر سکینڈلز دی نظر ہو گئی اے، ایونٹ وچ مالی جھیڑیاں دا معاملا اجے پوری طرحاں ختم ای نہیں ہویا کہ کھڈاریاں ولوں کُڑیاں نوں اپنے کمریاں وچ بُلان دا نواں سکینڈل کھڑا ہو گیا اے۔ تفصیل دے مطابق پچھلے دِنا لیگ ولوں دو مقامی انٹرنیشنل کرکٹرز الامین حسین تے صابر رحمن اُتے بھاری جرمانا کیتا گیا سی جہدی وجہ اوہناں ولوں مہمان سوانیاں نوں ہوٹل دے کمرے وچ بلانا سی۔
اطلاع دے مطابق لیگ انتظامیا ولوں روکے جان دے مگروں وی اک پاکستانی کرکٹرنے اک کُڑی نوں ہوٹل وچ بلایا، جہدی اطلاع ملدے ای انتظامیا حرکت وچ آگئی، جہدے بعد نہ صرف کُڑی نوں ہوٹل دے کمرے توں باہر کڈھیا گیا بلکہ کھڈاری نوں جھاڑ پائی گئی۔ حکام دے مطابق بی پی ایل انتظامیا نے پہلے ای جھیڑیاں نال بھری لیگ نوں نویں جھیڑے وچ اُلجھن توں روکن لئی معاملا دباءدِتا پر پاکستانی میڈیاتیک خبر پہنچن دے بعد ہن ایہ پتا لان دی کوشش ہو رہی اے کہ کُڑی نوں ہوٹل دے کمرے وچ بُلان والا پاکستانی کرکٹر کون اے؟ یاد رہوے کہ بی پی ایل دے چالو سیزن وچ پاکستانی کرکٹرز وچ عمرا اکمل، راجشاہی کنگز، شاہد آفریدی، ناصر جمشید تے انور علی، رنگپور رائیڈز، محمد نواز تے رومان رئیس باریسال بلز، شعیب ملک، چٹاکانگ ویکنز، احمد شہزاد، عماد وسیم، خالد لطیف، شاہ زیب حسن، سہیل تنویر تے اشعر زیدی میلا وکٹورینز، جنید خان تے محمد اصغر، کھلنا ٹائٹنز ولوں کھیڈ رہے نیں۔
پاکستانی تے عالمی میڈیا ایس کھوج وچ لگا ہویا اے کہ کسے طرحاں کُڑی نوں ہوٹل وچ بلان والے پاکستانی کرکٹر دا ناں تے اوس واقعے بارے ہور معلومات پتا لگ جان پر اجے تیکر کسے نوں کامیابی نہیں مل سکی۔
