ابوظہبی(پاکستان پوائنٹ نیوز16۔نومبر۔2018ء) قومی ٹیم دے فاسٹ باؤلر محمد عباس نے نیوزی لینڈ خلاف ٹیسٹ سیریز دوران اک ہور ملکی ریکارڈ اپنے ناں کر لیا اے۔ کیویز خلاف ابوظہبی ٹیسٹ دے پہلے دن محمد عباس نے دو وکٹاں لئیاں، جیہدے مگروں اوہ ٹیسٹ ڈیبیو دے بعد لگاتار 20اننگز وچ گھٹو گھٹ اک وکٹ لین والے پہلے پاکستانی باؤلر بن گئے ۔ محمد عباس نے سابق ٹیسٹ سپنر عبدالرحمان دا ریکارڈ توڑیا جیہناں نے لگاتار 19اننگز وچ ایہ کارنامہ انجام دتا سی۔
لیجنڈری فاسٹ باؤلر وسیم اکرم تے لیفٹ آرم سپنر ذوالفقار بابر نے 11,11لگاتار اننگز وچ گھٹو گھٹ اک شکار کیتا سی۔ٹیسٹ ڈیبیو مگروں لگاتار اننگز وچ گھٹو گھٹ اک وکٹ لین دا ورلڈ ریکارڈ سابق کیوی فاسٹ باؤلر شین بونڈ دے کول اے، جیہناں نے 32وار32 اننگز وچ اک وکٹ لئی سی۔ یاد رہوے کہ 3ٹیسٹ میچاں دی سیریز دے پہلے مقابلے دے پہلے دن ای پاکستان نے نیوزی لینڈ دی پہلی اننگز دے سکور 153دے جواب وچ 2وکٹاں اُتے 59سکور بنائے۔جدکہ دوجے دن دا کھیڈ کل پاکستان ایتھوں ای شروع کر یگا۔
