مانچسٹر(پاکستان پوائنٹ نیوز13۔نومبر۔2018ء) عام طور اُتے کرکٹ دی دنیا توں جدوں وی کوئی کھڈاری (ر) ہوندا اے تے مخالف تے اوہدی اپنی ٹیم ولوں اوہنوں الوداعی میچ وچ گارڈ آف آنر دتا جاندا اے۔ پر کرکٹ دے کُجھ دیوانے ایسے وی نیں جو خشی دے کسے موقعے اُتے وی انج دیاں ریتاں نوں جنم دیندے نیں جو اوہناں مگروں آن والیاں لئی مثال بن جاندیاں نیں۔ انگلینڈ وچ ہون والے اک ویاہ دوران لاڑے دے بیلیاں نے وی کُجھ انج ای کیتا ۔
بیلیاں دے ایس انداز نوں سوشل میڈیا اُتے بہت پسند کیتا جا رہیا اے۔ برطانیہ دے شہر مانچسٹر وچ اک پاکستانی ہارون ملک دے ولیمے دے دوران اوہدے بیلیاں نے اوہنوں انوکھا سرپرائز دتا۔ سوشل میڈیا اُتے وائرل ہون والی اک تصویر وچ ویکھیا جا سکدا اے کہ ہارون دے یار گارڈ آف آنر سٹائل وچ بلے نال بلا ملائے کھڑے نیں تے لاڑا ہیٹھوں لنگھ کے سٹیج ول جا رہیا اے۔
ہارون ملک دے یاراں نے ایہ پوسٹ سوشل میڈیا ویب سائٹ فیس بک اُتے شیئر کردے ہوئے لکھیاکہ ساڈے یار ہارون دا پچھلے مہینے ویاہ ہو گیا اے تے اسیں مُنڈیاں نے اوہنوں سنگل لائف توں میرڈ لائف وچ جان دی خشی وچ گارڈ آف آنر دتا۔ وسیلیاں مطابق ہارون ملک مانچسٹر دی مقامی سنڈے لیگ وچ کھیڈدا اے، ایہ سارے لوک سارا ہفتہ کم کردے نیں تے ایتوار نوں کرکٹ کھیڈدے نیں۔
