حیدر آباددکن(پاکستان پوائنٹ نیوز03۔نومبر۔2018ء) قومی ٹیم دے کرکٹر شعیب ملک و بھارتی ٹینس سٹار ثانیہ مرز ا دے پُتر اذہان دیاں تصویراں ساہمنے آ گئیاں۔ عالمی شہرت یافتہ ٹینس سٹار ثانیہ مرزا نوں حیدر آباد دے مقامی ہسپتال توں ڈسچارج کرن دیاں تصویر سوشل میڈیا اُتے وائرل ہو رہیاں نیں، جیہدے وچ ثانیہ مرزا اپنے پُتر نوں چُکدے ہوئے ہسپتال توں باہر آؤندیاں وکھالی دے رہیاں نیں۔
سپورٹس سٹار جوڑی نے اپنے پُتر دا ناں اذہان ملک رکھیا اے۔ یاد رہوے کہ چالو ہفتے قومی کرکٹ ٹیم دے نامور کھڈاری شعیب ملک تے اوہناں دی گھر والی ٹینس سٹار دے گھربال دا جنم ہویا۔ ایس بارے شعیب ملک نے آپ سوشل میڈیا پیغام راہیں بال دے پیدا ہون دی خبر دتی۔خبرساہمنے آن مگروں شعیب ملک دے جدی گھر وچ وی جشن دا سماں اے تے مبارکباد دین والیاں دی لائن لگ گئی۔
ڈی جی آئی ایس پی آر آصف غفور نے وی آل راؤنڈر شعیب ملک تے اوہناں دی گھر والی ثانیہ مرزا لئی نیک خاہشاں دا اظہار کیتا۔ سابق کپتان شاہد آفریدی نے وی مبارکباد تی تے آکھیا کہ رب تہاڈے خاندان نوں خش رکھے۔ شعیب ملک نوں مبارکباد دین والیاں وچ حسن علی، محمد عامر، جنید خان، عثمان شنواری، سہیل تنویر، بسمہ معروف، کائنات امتیاز سنے سوانی کھڈارناں وی شامل سن۔
