لاہور(پاکستان پوائنٹ نیوز14۔ستمبر۔2018ء) وکٹ لین مگروں ’جونیٹر سٹائل‘ وچ خشی دا وکھالا کرن والے حسن علی اپنے وکھرے ہیئر سٹائل دی وجہ توں اک وار فیر توجہ دا مرکز بن گئے۔ تفصیل مطا بق حسن علی دی گنتی اوہناں نوجواناں وچ ہوندی اے جو کرکٹ دی دنیا وچ آئے تے چھا گئے، حسن علی نے کرکٹ دی شروعات پاکستان سپر لیگ توں کیتی۔ پاکستانی فاسٹ باؤلر حسن علی بارے سبھ دی اک ای رائے اے کہ اوہ جدوں دے پاکستانی کرکٹ ٹیم وچ آئے نیں اوہناں نے اپنی بولنگ نال ٹیم وچ اک نویں روح پا دتی اے۔
تھوڑے چِر وچ اوہناں نے کئی اعزاز اپنے ناں کیتے۔ حسن علی دے وکٹ لین مگروں خاص سٹائل نوں ڈاڈھا پسند کیتا گیا۔حسن علی دے ایس سٹائل نوں ’جنریٹر سٹائل‘ دا ناں وی دتا جاندا اے۔ پر ہن حسن علی دے نویں ہیئر سٹائل دے وی سوشل میڈیا اُتے بہت چرچے نیں۔
