دبئی(پاکستان پوائنٹ نیوز12۔ستمبر۔2018ء) امام الحق تے نویں فیلڈنگ کوچ نے دبئی وچ قومی ٹیم نوں جوائن کر لیا۔ تفصیل مطابق قومی ٹیم د ے بلے باز امام الحق تے نویں فیلڈنگ کوچ گرانٹ بریڈ برنٹ نے ایشیاء کپ لئی دبئی وچ قومی ٹیم نوں جوائن کر لیا اے۔ امام الحق ویزے وچ دیر کارن قومی ٹیم نال نہیں جا سکے سن پر اج اوہناں نے دبئی اپڑ کے ٹیم نوں جوائن کر لیا اے۔
دوجے پاسے قومی کرکٹ ٹیم لئی فیلڈنگ کوچ گرانٹ بریڈ برنٹ وی دبئی اپڑ گئے ، اوہناں نوں پی سی بی نے کُجھ دن پہلاں ای فیلڈنگ کوچ دے عہدے اُتے تعینات کیتا اے۔ چیتے رہوے کہ ایشیاء کپ کرکٹ ٹورنامنٹ 15توں 28ستمبر تیکر متحدہ عرب امارات وچ کھیڈیا جائے گا جیہدے وچ پہلی وار چھ ٹیماں ایکشن وچ وکھالی دین گیاں۔ پاکستان، بھارت، سری لنکا، بنگلا دیش تے افغانستان نے سدھی ایونٹ وچ تھاں بنا لی سی پر ہانگ کانگ، ملائیشیا، نیپال ، اومان، سنگا پور تے متحدہ عرب امارات وچوں کوئی اک ٹیم کوالیفائنگ مرحلے نوں پار کر کے ایونٹ تیکر اپڑے گی۔
