راولپنڈی(پاکستان پوائنٹ نیوز08۔ستمبر۔2018ء) نسوار کھان والی تصویر اُتے شاہد آفریدی دا موقف وی ساہمنے آ گیا، نسوار نہیں سپاری سی۔تفصیل مطابق دفاع دیہاڑ اُتے آرمی جنرل ہیڈ کوارٹر راولپنڈی وچ تقریب ہوئی۔ جیہدے وچ وزیر اعظم عمران خان نے بطور اُچیچے پروہنے رلت کیتی۔ تقریب وچ حکومتی بندیاں توں وکھ اپوزیشن لیڈر میاں شہباز شریف وی لیگی قیادت نال موجود سن۔
ایہدے نال نال بلاول بھٹو زرداری وی پیپلز پارٹی دی قیادت نال ایس تقریب وچ رلتی ہوئے۔ سیاسی بندیاں توں وکھ ایس تقریب وچ کھڈاری، فنکار، شہیداں دے وارث تے ہور لوکاں رلتی ہوئے۔ایس تقریب وچ مشہور کھڈاری شاہد خان آفریدی وی رلتی ہوئے تے ایس دوران اوہناں نے اک اجیہی حرکت کیتی کہ سبھ دیاں نظراں وچ آ گئے۔ شاہد آفریدی تقریب دوران نسوار رکھدے ہوئے رنگے ہتھیں پھڑے گئے۔
اوہناں نے نسوار رکھن توں پہلاں ایدھر اودھر ویکھیا تے فیر مونہ وچ نسوار رکھ لی پر شاہد آفریدی ایہ سبھ کردے ہوئے کیمرے دی اکھ توں نہ بچ سکے۔پر اج پرچا کاراں نال گل بات کردے ہوئے ایس واقعے بارے شاہد آفریدی توں سوال کیتا گیا تے اوہناں دا کہنا سی کہ اوہ نسوار نہیں سپاری سی جو ہن اوہناں دی جیب وچ اے تے جے کسے نے لونگ تے سونف دا مزہ لینا اے اوہ اوہنوں دے سکدے نیں۔ بعدوں اوہناں نے اپنی جیب وچوں اک پیکٹ کڈھ کے ساہمنے کھلوتے پرچا کار دے مونہ وچ سپاری پا کے اوہدے کولوں سوال کیتا کہ ’خشبو آئی‘ جیہدے اُتے سارے پرچا کار ہسن لگ پئے۔
