لاہور( پاکستان پوائنٹ نیوز11۔اگست۔2018ء ) چیئرمین پی سی بی احسان مانی نوں بنائے جان دی آس۔تفصیل مطابق پاکستان وچ حکومت بدلن دے نال نال کھیڈاں دیاں تنظیماں دے عہدے داراں دے بدلے جان دا کم کوئی نویں گل نہیں اے پر چیئرمین کرکٹ بورڈ تے اک اجیہا عہدہ اے جیہدے لئی بیتے ویلے وچ کئی سیاسی پارٹیاں دے رہنما اپنیاں وزارتاں چھڈن نوں تیار نظر آئے۔ حکومت دی بدلی مگروں پرچاکار دے طور اُتے تحریک انصاف دے ناقداں دی گنتی وچ شامل نجم سیٹھی نوں چیئرمین پی سی بی دے عہدے توں ہٹائے جان دیاں خبراں سُنائی دے رہیاں نیں۔
ایہناں حالات وچ آپ نجم سیٹھی وی عہدہ چھڈن دا اشارہ دے چکے نیں۔دوجے پاسے وسیلیاں مطابق احسان مانی ایس عہدے لئی دوڑ وچ سبھ توں اگانہ نیں۔ آئی سی سی دے سابق چیف بھاویں دُہری شہریت رکھدے نیں پر ایہ شے اوہناں دی راہ وچ رکاوٹ نہیں بن سکدی۔ ایس توں پہلاں سابق صدر و آرمی چیف جنرل (ر) پرویز مشرف دے دور وچ امریکی شہری ڈاکٹر نسیم اشرف چیئرمین پی سی بی دا عہدہ رکھ چُکے نیں۔ حکومتی عہدیاں دے اُلٹ دُہری شہریت دے قانون دا اطلاق کرکٹ بورڈ دے معاملے وچ نہیں ہوندا۔ ایہناں حالات وچ کرکٹ دا وڈا تجربہ تے شفاف ماضی رکھن والے احسان مانی دا راہ پدھر وکھالی دے رہیا اے۔ ایس حوالے نال چھیتی کوئی فیصلا ہون دی آس اے۔
