کراچی( پاکستان پوائنٹ نیوز14۔جون2018ء ) محکمہ جنگلی حیات سندھ نے شاہد آفریدی دے گھر شیر دی موجودگی دا نوٹس لیندے ہوئے اوہناں خلاف تحقیقات دا حکم دے دتا اے۔ کُجھ دن پہلاں شاہد آفریدی نے سوشل میڈیا اُتے دو تصویراں شیئر کیتیاں سن جیہناں وچوں اک تصویر وچ شاہد آفریدی دے گھراندر شیر نظر آ رہیا سی۔ ایہناں تصویراں دی وجہ توں سوشل میڈیا اُتے طوفان چُکیا گیا تے ورتیندڑا(صارفین) نے اوہناں نوں تنقید دا اینا نشانہ بنایا کہ محکمہ جنگی حیات سندھ نے وی اوہناں دے گھر وچ شیر دی موجودگی دا نوٹس لیندے ہوئے شاہد آفریدی خلاف تحقیقات دا حکم دے دتا۔
محکمہ سندھ جنگلی حیات دے سربراہ تاج محمد شیخ دا کہنا اے کہ اوہناں نے شاہد آفریدی دے گھر وچ شیر دی موجودگی بارے تحقیقات دا حکم دتا سی ، جے شاہد آفریدی مجرم ثابت ہوئے تے اوہناں خلاف کارروائی کیتی جائے گی۔ تاج محمد شیخ کولوں جدوں پُچھیا گیا کہ شاہد آفریدی خلاف کیہ کارروائی کیتی جائے گی تے اوہناں نے آکھیا کہ شاہد آفریدی نوں ایس حوالے نال خبردار کیتا جا سکدا اے یاں اوہناں نوں جرمانہ وی کیتا جا سکدا اے کیونکہ گھر وچ جنگلی جنور رکھنا خطرناک ہو سکدا اے۔
