لاہور(پاکستان پوائنٹ نیوز10۔مارچ2018ء) پاکستان سپر لیگ دے مقابلے یو اے ای وچ جاری نیں تے پاکستانی ایس گل دی اُڈیک وچ نیں کہ کدوں پی ایس ایل دا ایونٹ پاکستان وچ آئے تے کرکٹ نال پیار کرن والے اپنی اپنی پسند دے کھڈاریاں نوں اپنیاں اکھاں ساہمنے تے اپنے گراؤنڈ وچ کھیڈدا ویکھن، ایہدے نال نال پاکستانی اک ہور خاہش وی رکھدے نیں کہ اوہناں نوں ایہ میچ ویکھن دیاں کیتوں مفت ٹکٹاں مل جان۔
مفت ٹکٹاں تے پاس لین دی خاہش رکھن والے بندیاں لئی پی سی بی دے چیئرمین نجم سیٹھی نے سماجی رابطے دی ویب سائٹ اُتے جاری اپنے پیغام وچ آکھیا کہ میں دوستاں، رشتے داراں، حکومتی ارکان، اعلا عہدیدار ، وی آئی پی لوکاں تے وی آئی پی بنن دی خاہش کرن والے لوکاں توں درخاست کرنا واں کہ اوہ سبھ یاں تے آئن لائن ٹکٹ لین یاں فیرلاہور تے کراچی وچ موجود ٹی سی ایس سنٹرز توں ٹکٹاں مُل لین۔ اوہناں دا اپنے پیغام وچ کہنا اے کہ مہربانی کر کے میرے کولوں مفت پاس نہ منگو، تُسیں سارے پیسیاں دے بدلے ٹکٹ مُل لین دی طاقت رکھدے او، بہت بہت شکریہ۔
