لاہور(پاکستان پوائنٹ نیوز01۔فروری2018ء) پاکستان کرکٹ بورڈ نے ہیڈ کوچ مکی آرتھر دیاں سفارشاں اُتے عمل کردے ہوئے لیگ سپنر شاداب خان، فاسٹ باؤلر حسن علی تے آل راؤنڈر فہیم اشرف نوں ہانگ کانگ ٹی ٹونٹی کھیڈن دی اجازت دین توں انکار کر دتا۔تفصیل مطابق قومی ٹیم دے ہیڈ کوچ مکی آرتھر نے نیوزی لینڈ خلاف ون ڈے سیریز وچ وائٹ واش مگروں میڈیا نال گل بات کردے ہوئے آکھیا سی کہ سری لنکا خلاف سیریز مگروں پنج ہفتیاں وچ ای کھڈاری جسمانی تے تکنیکی طور اُتے بہت پچھے چلے گئے، ہر قسم دی ٹی ٹونٹی لیگز کھیڈن نال کارکردگی وچ وگاڑ پیدا ہویا، اوہ چاہندے نیں کہ کھڈاری پیسے کمان پر ایس انداز وچ کہ ٹیم نوں قیمت نہ دینی پئے۔
مکی آرتھر نے مثال دیندے ہوئے آکھیاکہ حسن علی نے چیمپئنز ٹرافی مگروں ہر قسم دی کرکٹ کھیڈی جدکہ ٹرینٹ بولٹ تن مہینے دا ہوم ورک کر کے پاکستان خلاف سیریز دا حصہ بنے، دوواں دی کارکردگی وچ واضح فرق نظر آیا۔ اوہناں نے پی سی بی نوں کھڈاریاں دا ورک لوڈ گھٹ کرن لئی اوہناں نوں زیادہ لیگز کھیڈن توں روکن دی تجویز دتی سی جہدے مگروں ہن پاکستان کرکٹ بورڈ نے انجریز تے بُہتی تھکاوٹ توں بچن لئی لیگ سپنر شاداب خان، فاسٹ باؤلر حسن علی تے آل راؤنڈر فہیم اشرف نوں 6توں 11فروری تیکر شیڈول ہانگ کانگ ٹی ٹونٹی کھیڈن دی اجازت دین توں انکار کر دتا اے۔
